ఫీజు రీయింబర్స్మెంట్, స్కూళ్ల మూసివేతపై వామపక్ష విద్యార్థి నేతల మినిస్టర్ క్వార్టర్స్ ముట్టడి; పోలీసులతో తోపులాట

హైదరాబాద్‌లోని మంత్రుల క్వార్టర్స్ వద్ద ఈరోజు వామపక్ష విద్యార్థి సంఘాలు నిరసన చేపట్టాయి. ఫీజు రీయింబర్స్మెంట్ బకాయిలు విడుదల, గురుకుల విద్యాలయాలకు సొంత భవనాల నిర్మాణం, ప్రభుత్వ పాఠశాలల మూసివేత నిర్ణయాన్ని వెనక్కి తీసుకోవాలని వారు డిమాండ్ చేశారు.

నిరసనకారులు క్వార్టర్స్లోకి ప్రవేశించేందుకు ప్రయత్నించగా, పోలీసులు వారిని అడ్డుకున్నారు. ఈ క్రమంలో విద్యార్థి నేతలు, పోలీసుల మధ్య స్వల్ప తోపులాట జరిగింది. పలువురు విద్యార్థి నేతలను పోలీసులు అదుపులోకి తీసుకున్నారు.

విద్యార్థి నాయకులు మాట్లాడుతూ, సీఎం రేవంత్ రెడ్డి ప్రకటించిన 23,000 ప్రభుత్వ పాఠశాలల మూసివేత నిర్ణయం పేద, మధ్యతరగతి విద్యార్థుల భవిష్యత్తును ప్రశ్నార్థకంగా మారుస్తుందని విమర్శించారు. ఆరేళ్లుగా ఫీజు రీయింబర్స్మెంట్ విడుదల కాకపోవడంతో చదువులు నిలిచిపోయే పరిస్థితి ఉందని వారు ఆరోపించారు.

తమ డిమాండ్లను పరిష్కరించని పక్షంలో రాష్టవ్యాప్తంగా ఆందోళన తీవ్రతరం చేస్తామని, మంత్రులు, ఎమ్మెల్యేలు, ముఖ్యమంత్రి కూడా తిరగడానికి వీల్లేకుండా చేస్తామని హెచ్చరించారు. రాష్ట్రంలో పలు చోట్ల విద్యార్థి సంఘాలు బందుకు పిలుపునిచ్చాయి. ఈ ఘటనపై ప్రభుత్వం నుంచి ఇంకా స్పందన రాలేదు.