సూర్య ఆరాధన వల్ల ఆరోగ్యం పెరుగుతుందా? పురాణాలు, విజ్ఞానం ఏం చెప్తున్నాయి

హిందూ సంప్రదాయంలో సూర్య ఆరాధన ఆరోగ్యానికి మేలు చేస్తుందని విశ్వాసం ఉంది. భాగవతంలోని కథ ప్రకారం, కృష్ణుడి కుమారుడు సాంబుడికి కుష్టు వ్యాధి వచ్చినప్పుడు ఋషులు సూర్య ఆరాధన చేయమని సూచించారు. సాంబుడు సూర్యుణ్ణి ఆరాధించగా వ్యాధి తగ్గిందని పురాణం చెప్తోంది.

మయూర శతకం రాసిన మయూర కవి కూడా సూర్యనారాయణ మూర్తిని స్తుతించడం వల్ల తన శారీరక వ్యాధి తగ్గిందని పేర్కొన్నాడు.

విజ్ఞాన శాస్త్రపరంగా చూసినా సూర్యుని కిరణాల వల్ల విటమిన్ D శరీరంలో తయారవుతుంది. వైద్యులు కూడా విటమిన్ D లోపానికి ప్రతిరోజూ కొంత సేపు ఎండలో ఉండమని సూచిస్తారు.

సూర్యోదయ సమయంలో స్నానం చేసి, రాగి చెంబులో నీళ్లు తీసుకుని, ఎర్రని పూలతో సూర్యుడికి అర్ఘ్యం ఇవ్వడం సనాతన సంప్రదాయం. 12 సార్లు సూర్యుడికి నీళ్లు వదిలితే ఆరోగ్యం మెరుగవుతుందని ఈ సంప్రదాయంలో విశ్వాసం ఉంది.

సూర్య నమస్కారాలు, అరుణ పారాయణం వంటి ఆచారాలు కూడా ఈ సంప్రదాయంలో భాగమే. సూర్యుడు సముద్రపు నీటిని ఆవిరి చేసి వర్షాన్ని కురిపిస్తాడని, తద్వారా జీవులకు ఆహారం లభిస్తుందని శాస్త్రీయంగా కూడా అర్థం ఉందని నిపుణులు వివరిస్తున్నారు.