చెత్త నిబంధనలు పాటించని వారికి విద్యుత్, నీటి సరఫరా నిలిపివేత: సుప్రీం కోర్టు

సుప్రీం కోర్టు దేశవ్యాప్తంగా చెత్త నిర్వహణపై కీలక ఆదేశాలు జారీ చేసింది. చెత్త నిబంధనలు పాటించని భారీ వ్యర్థ ఉత్పత్తిదారులకు విద్యుత్, నీటి సరఫరా తాత్కాలికంగా నిలిపివేయాలని కోర్టు స్పష్టం చేసింది.

ఈ ఆదేశాల ప్రకారం మాల్స్, హోటల్స్, ఆసుపత్రులు, వాణిజ్య సముదాయాలు, పెద్ద అపార్ట్‌మెంట్ సొసైటీలపై ప్రత్యేక దృష్టి పెట్టారు. భారీ వ్యర్థ ఉత్పత్తిదారులను ఆరు వారాల్లో గుర్తించాలని కోర్టు ఆదేశించింది. చెత్తను వేరు చేయడం, సురక్షితంగా నిల్వ చేయడం, నిర్దేశిత విధానంలో అప్పగించడం తప్పనిసరి చేసింది.

చెత్త డంప్‌లకు సంబంధించి జియో టాగ్ ఫోటోలు తప్పనిసరి చేశారు. పాఠశాలలు, కాలేజీల్లో చెత్త నిర్వహణపై అవగాహన కల్పించాలని కోర్టు సూచించింది. చెత్త వేయడం ఒకరి పని, శుభ్రం చేయడం పారిశుద్ధ్య కార్మికుల బాధ్యత అనే ధోరణిని సుప్రీం కోర్టు తప్పుబట్టింది.

నిబంధనలు పాటిస్తేనే తిరిగి నీరు, విద్యుత్ సరఫరా చేస్తారు. వ్యర్థాల నిర్వహణ నిబంధనను దేశవ్యాప్తంగా కఠినంగా అమలు చేయాలని కోర్టు ఆదేశించింది.