పాదాచారుల హక్కులు: రహదారి కాలిబాటల భద్రత స్థానిక సంస్థలదే – సుప్రీంకోర్టు

పాదాచారులు సురక్షితంగా నడిచే హక్కు ప్రాథమికమని సుప్రీంకోర్టు తీర్పు చెప్పింది. రహదారుల వెంట ఫుట్ పాత్ల నిర్మాణం, నిర్వహణ బాధ్యత స్థానిక సంస్థలదేనని స్పష్టం చేసింది.

జస్టిస్ పీఎస్ నరసింహ, జస్టిస్ ఎంఎస్ చందూర్కర్‌లతో కూడిన ధర్మాసనం ఈ తీర్పు వెలువరించింది. ఒక బాలుడు తండ్రితో కలిసి పాఠశాలకు వెళ్తుండగా, వెనుక నుంచి వచ్చిన లారీ ఢీ కొట్టడంతో మృతి చెందాడు. ఫుట్ పాత్ లోపించడం వల్లే ప్రమాదం జరిగిందని బాలుడి తండ్రి న్యాయస్థానాన్ని ఆశ్రయించారు.

విచారణ సందర్భంగా ధర్మాసనం, వాహనాల రాకపోకల కంటే ఫుట్ పాత్లపై నడిచే వారి భద్రతకే ఎక్కువ ప్రాధాన్యం ఉంటుందని వ్యాఖ్యానించింది. పాదాచారుల భద్రత నిర్ధారించడం స్థానిక సంస్థల ప్రాథమిక బాధ్యత అని తెలిపింది.

దిగువ కోర్టు నిర్ణయించిన పరిహారాన్ని సుప్రీంకోర్టు రూ.11.44 లక్షలకు పెంచింది. ఈ మొత్తాన్ని రెండు నెలల్లోపు బాధిత కుటుంబానికి చెల్లించాలని సంబంధిత వ్యక్తులను ఆదేశించింది. నడక హక్కు ఉల్లంఘన జరిగితే నష్టపరిహారం కోసం న్యాయపరంగా చర్యలు తీసుకునే హక్కు పౌరులకు ఉందని కోర్టు స్పష్టం చేసింది.