అయోధ్య రామమందిర విరాళాల వివాదం: సీసీటీవీ, డీవీఆర్ రికార్డుల భద్రతకు సుప్రీం ఆదేశం

అయోధ్య రామమందిర నిర్మాణానికి వచ్చిన విరాళాల్లో అక్రమాలు జరిగాయన్న ఆరోపణలపై సుప్రీంకోర్టు కీలక ఆదేశాలు జారీ చేసింది. సోమవారం నాటికి ఎస్ఐటీ (సిట్) విచారణ స్థితిగతులపై నివేదిక దాఖలు చేయాలని రాష్ట్ర ప్రభుత్వాన్ని, దర్యాప్తు సంస్థను ఆదేశించింది. విచారణ సమయంలో సీసీటీవీ ఫుటేజీ, డీవీఆర్ రికార్డింగులు, హుండీ రిజిస్టర్లు వంటి కీలక సాక్ష్యాలు ఆటోమేటిగ్గా డిలీట్ కావచ్చని, డామేజ్ కావచ్చని పిటిషనర్ తరఫు న్యాయవాది వాదించారు. ఈ నేపథ్యంలో వాటిని భద్రపరచాలని సుప్రీంకోర్టు ఆదేశించింది.

ఈ పిటిషన్‌ను సుధాకర్ సింగ్ అనే వ్యక్తి దాఖలు చేశారు. శ్రీరామ జన్మభూమి తీర్థ క్షేత్ర ట్రస్ట్‌కు వచ్చిన విరాళాల దుర్వినియోగం జరిగిందని, పారదర్శకత లేదని ఆయన ఆరోపించారు. రిక్షాలో వెళ్లి పది రూపాయలు విరాళంగా ఇచ్చిన వ్యక్తి నుంచి పెద్ద మొత్తాల వరకు ప్రజలు ఇచ్చిన సొమ్ము దేవుడి ఆస్తి అని, ట్రస్ట్ కేవలం నిర్వాహకుడిగానే పనిచేయాలని వాదించారు. ప్రస్తుతం ఎస్ఐటీ విచారణ జరుగుతోంది. అయితే విచారణపై సందేహాలు ఉండడంతో సీబీఐ విచారణ జరపాలని, లేదా కోర్టు పర్యవేక్షణలో ఎస్ఐటీ పనిచేయాలని, ఇప్పటివరకు వచ్చిన విరాళాల వివరాలను ప్రచురించి, నిరంతర ఆడిట్ చేయాలని పిటిషనర్ కోరారు. సాలిసిటర్ జనరల్ ఈ దశలో నోటీసులు అవసరం లేదని కోర్టుకు తెలిపారు.

సోమవారం లోపు రాష్ట్ర ప్రభుత్వం స్టేటస్ రిపోర్ట్ దాఖలు చేయాలి. ఆ తర్వాత సుప్రీంకోర్టు నివేదికను పరిశీలించి తదుపరి చర్యలపై నిర్ణయం తీసుకుంటుంది. ఎస్ఐటీ విచారణ నాణ్యతపై మాత్రం కోర్టు ఎలాంటి వ్యాఖ్యలు చేయలేదు.