అమెరికాలో కూతురి పెళ్లి.. సూర్యాపేటలో స్క్రీన్‌పై అక్షింతలు చల్లి ఆశీర్వాదం

సూర్యాపేట జిల్లా హుజూర్‌నగర్ మండలం వేపల సింగారం గ్రామానికి చెందిన జయరాజు, జ్యోతి దంపతులు తమ కూతురి పెళ్లిని వీడియో కాల్ ద్వారా చూసి ఆశీర్వదించారు. వీసా సమస్యల కారణంగా వీరు అమెరికా వెళ్లలేకపోయారు.

వీరి కూతురు హిమబిందు ఉన్నత చదువుల తర్వాత ఉద్యోగం కోసం అమెరికా వెళ్లారు. అక్కడ ఎన్టీఆర్ జిల్లాకు చెందిన రోహిత్ కుమార్‌తో పరిచయం ఏర్పడింది. ఇరు కుటుంబాల అంగీకారంతో వీరు అమెరికాలో వివాహం చేసుకోవాలని నిర్ణయించారు.

శుక్రవారం రాత్రి అమెరికాలో హిమబిందు, రోహిత్ కుమార్ వివాహం జరిగింది. తాళి కట్టే సమయంలో తల్లిదండ్రులు టీవీ స్క్రీన్‌పై అక్షింతలు చల్లి కూతురిని ఆశీర్వదించారు.

వేపల సింగారంలో కుటుంబ సభ్యులు, బంధువులు, గ్రామస్థులు కలిసి పెళ్లి విందు ఏర్పాటు చేశారు. ఈ వీడియో సోషల్ మీడియాలో వైరల్ అవుతోంది.