సికింద్రాబాద్ ఉజ్జయిని మహంకాళి బోనాల ఉత్సవాల్లో మాజీ మంత్రి తలసాని శ్రీనివాస్ యాదవ్ పాల్గొన్నారు

సికింద్రాబాద్‌లోని ఉజ్జయిని మహంకాళి ఆలయంలో బోనాల ఉత్సవాలు నిర్వహిస్తున్నారు. ఈ సందర్భంగా మాజీ మంత్రి, BRS ఎమ్మెల్యే తలసాని శ్రీనివాస్ యాదవ్ ఆలయాన్ని సందర్శించి అమ్మవారికి బోనం సమర్పించారు. ఆలయ అర్చకులు ఆయనను ఆహ్వానించి పూజలు చేయించారు.

అనంతరం తలసాని మాట్లాడుతూ, బోనాల ఉత్సవాలు సజావుగా జరగడానికి అన్ని ప్రభుత్వ శాఖలూ సహకరించాలని కోరారు. ఉదయం రంగం, మధ్యాహ్నం తొట్టేల ఊరేగింపు, ఆ తర్వాత పలారం మండల ఊరేగింపు, రేపు ఉదయం అంబారీ ఊరేగింపు వంటి కార్యక్రమాలు షెడ్యూల్ ప్రకారం జరుగుతాయని తెలిపారు. ఉత్సవాల నిర్వహణలో పాల్గొన్న స్వచ్ఛంద సంస్థలు, అధికారులకు ఆయన అభినందనలు చెప్పారు.

ఈ ఆలయానికి 200 సంవత్సరాల చరిత్ర ఉండగా, బోనాల నిర్వాహక సంస్థ దక్కన్ మానవ సేవా సమితికి 100 సంవత్సరాల చరిత్ర ఉందని ఆయన గుర్తుచేశారు. 2014లో తెలంగాణ రాష్ట్రం ఏర్పడిన తర్వాత అప్పటి ముఖ్యమంత్రి కె.చంద్రశేఖరరావు ఈ ఉత్సవాన్ని రాష్ట్ర పండుగగా ప్రకటించారు. గత 30 ఏళ్లుగా తెలుగుదేశం, టీఆర్ఎస్ ప్రభుత్వాల హయాంలో ఈ ఉత్సవాల నిర్వహణలో తాను కీలకంగా వ్యవహరించినట్లు తలసాని చెప్పారు.

అమ్మవారిని దర్శించుకున్న ఆయన, రాష్ట్రంలో వర్షాలు సమృద్ధిగా కురిసి రైతులు, ప్రజలు సుఖంగా ఉండాలని ఆకాంక్షించారు.