తమిళనాడులో లంచం ఫిర్యాదులకు వాట్సాప్ నెంబర్ ఏర్పాటు

తమిళనాడు ప్రభుత్వం ప్రభుత్వ కార్యాలయాల్లో లంచం డిమాండ్లపై ఫిర్యాదు చేసేందుకు వాట్సాప్ నెంబర్ (94981 80936) ఏర్పాటు చేసింది. లంచం అడగడం, ఇవ్వడం రెండు నేరాలని తెలిపే నోటీస్ బోర్డులను అన్ని కార్యాలయాల్లో తప్పనిసరిగా ప్రదర్శించాలని ఆదేశించింది.

ఈ నోటీస్ బోర్డులు తమిళం, ఆంగ్లం భాషల్లో ఉండాలని, అలాగే ఈ నెంబర్, యాంటీ కరప్షన్ పోర్టల్ లింక్ అన్ని ప్రభుత్వ శాఖల వెబ్‌సైట్లలో ఉంచాలని సూచించింది.

గతంలో 12 ఏళ్ల కింద ఇలాంటి ఆదేశాలు జారీ అయినా సక్రమంగా అమలు కాలేదని గుర్తించిన ప్రభుత్వం, తాజా ఉత్తర్వులను సమగ్రంగా అమలు చేయాలని నిర్ణయించింది. అవినీతిపై ఆకస్మిక తనిఖీలు నిర్వహించేందుకు జిల్లా కలెక్టరేట్లలో ప్రత్యేక బృందాలను ఏర్పాటు చేయనున్నారు.

ఫిర్యాదులు వాట్సాప్, ఈమెయిల్, ల్యాండ్‌లైన్ నంబర్ల ద్వారా కూడా చేయవచ్చు. పారదర్శక పాలన కోసం ఈ చర్యలు తీసుకుంటున్నామని అధికారులు తెలిపారు.