తమిళనాడు గ్రామంలో పెళ్లికాని యువత మద్యం తాగితే రూ.5,000 జరిమానా

తమిళనాడులోని నాగపట్టణం జిల్లా విలుండమావడి గ్రామ పంచాయతీ కొత్త నిర్ణయం తీసుకుంది. పెళ్లికాని యువత గ్రామంలో మద్యం తాగితే రూ.5,000 జరిమానా విధించనున్నారు.

గ్రామంలో పెరుగుతున్న మద్యం వినియోగం, గొడవలను నివారించేందుకే ఈ నిర్ణయం తీసుకున్నట్టు గ్రామ పెద్దలు తెలిపారు. యువత మద్యానికి బానిస కాకుండా ఉండాలన్నది లక్ష్యమని చెప్పారు.

యువత ఎవరైనా మద్యం తాగినట్టు ఆధారాలతో పంచాయతీకి సమాచారం ఇస్తే వారికి నగదు ప్రోత్సాహకం ఇస్తామని పంచాయతీ తెలిపింది. పెళ్లయిన వారు, వృద్ధులు మద్యం తాగి ఇంట్లో లేదా బయట గొడవలు చేస్తే వారికీ జరిమానా విధిస్తామని తీర్మానించింది.

ఈ నిర్ణయం ఆగస్టు 2 నుంచి అమల్లోకి వచ్చింది. గ్రామంలో పోస్టర్లు కూడా ఏర్పాటు చేశారు. అప్పటి నుంచి గ్రామంలో మద్యం సంబంధిత గొడవలు కనిపించలేదని గ్రామస్థులు చెబుతున్నారు.