నంద్యాల జెడ్పీ చైర్మన్ పదవి టీడీపీకి.. ముగ్గురు నేతల మధ్య పోటీ

నంద్యాల జిల్లా జెడ్పీ చైర్మన్ పదవి టీడీపీకి దక్కింది. జిల్లాలో మొత్తం 28 జెడ్పీటీసీ స్థానాలకు గాను టీడీపీ 23 స్థానాలు గెలుచుకుంది. YSRCP ఐదు స్థానాలకు పరిమితమైంది.

ఎనిమిది జెడ్పీటీసీ స్థానాలు ఏకగ్రీవమయ్యాయి. అందులో టీడీపీ ఏడు, YSRCP ఒకటి దక్కించుకున్నాయి. మిగిలిన 20 స్థానాలకు ఎన్నికలు జరిగాయి. ఇందులో టీడీపీ 16, YSRCP నాలుగు స్థానాలు గెలుచుకున్నాయి. చైర్మన్ పదవి టీడీపీ వాటాకు రావడంతో ఆ పీఠం ఎవరికి అనే చర్చ మొదలైంది.

చైర్మన్ సీటు అన్‌రిజర్వ్‌డ్‌గా ఉండటంతో పోటీ ఎక్కువగా ఉంది. వెలుగోడు జెడ్పీటీసీ నుంచి ఏకగ్రీవంగా ఎన్నికైన గుండం రమణా రెడ్డి, సిరివెళ్ళ జెడ్పీటీసీ కాటంరెడ్డి శ్రీకాంత్ రెడ్డి, ఆళ్లగడ్డ జెడ్పీటీసీ పోరెడ్డి రాజశేఖర్ రెడ్డి ఈ పదవిని ఆశిస్తున్నారు.

గుండం రమణా రెడ్డికి ఒక మంత్రి, స్థానిక ఎమ్మెల్యేల మద్దతు ఉన్నట్లు సమాచారం. కాటంరెడ్డి శ్రీకాంత్ రెడ్డి పార్టీలో సీనియర్ నేత. పోరెడ్డి రాజశేఖర్ రెడ్డికి ఆళ్లగడ్డ ఎమ్మెల్యే భూమా అఖిల మద్దతు ఉన్నట్లు తెలుస్తోంది.

గుండం రమణా రెడ్డి కుటుంబం తొలి నుంచి టీడీపీలో కొనసాగుతోంది. ఆయన ఆర్థికంగా బలవంతుడు. కాటంరెడ్డి శ్రీకాంత్ రెడ్డి దశాబ్దాలుగా పార్టీకి విధేయుడిగా ఉన్నారు. పోరెడ్డి రాజశేఖర్ రెడ్డి కూడా ఆర్థికంగా బలమైన నేత. పార్టీ అధిష్ఠానం విధేయత, ఆర్థిక బలం వంటి అంశాలను పరిగణనలోకి తీసుకుని ఎంపిక చేయనుంది.