అంబేద్కర్ ఓపెన్ యూనివర్సిటీలో కంచ ఐలయ్య 'శూద్ర జీవితం' పుస్తక ఆవిష్కరణ

హైదరాబాద్‌లోని డాక్టర్ బీఆర్ అంబేద్కర్ ఓపెన్ యూనివర్సిటీ వేదికగా ఛాయా సాహిత్యోత్సవం జరుగుతోంది. రెండో రోజు కార్యక్రమంలో ప్రొఫెసర్ కంచ ఐలయ్య 'శూద్ర జీవితం' పుస్తకాన్ని ఆవిష్కరించారు.

పుస్తకావిష్కరణ కార్యక్రమాన్ని ఇద్దరు శూద్ర మహిళలు సృజన యాదవ్, బత్తిని దీప్తి నిర్వహించారు. తన జీవిత అనుభవాలు, ఎదుర్కొన్న సామాజిక పరిస్థితులు, ఆలోచనా విధానం, రచనా ప్రస్థానం ఈ పుస్తకంలో ఉన్నాయని కంచ ఐలయ్య తెలిపారు.

సాహిత్యం సమాజంలోని అణగారిన వర్గాల గొంతుకగా నిలవాలనే అంశంపై కార్యక్రమంలో చర్చ జరిగింది. సామాజిక చైతన్యానికి సాహిత్యం దోహదపడాలనే సందేశంతో సాహిత్యోత్సవం కొనసాగుతోంది.

కార్యక్రమంలో మాట్లాడుతూ కంచ ఐలయ్య పలు అంశాలపై తన అభిప్రాయాలు వెలిబుచ్చారు. పేర్లు, సామాజిక అలవాట్లపై బ్రాహ్మణీయ ప్రభావం ఉందని ఆయన అన్నారు. భారతదేశంలో కులం ప్రేమను బాల్యం నుంచే దెబ్బతీసిందని ఆయన అభిప్రాయపడ్డారు. తన రచనల్లో ప్రేమ, మట్టి ప్రాముఖ్యతను చెప్పానని తెలిపారు. ఇంగ్లిష్ చదువుకున్న వర్గాలు తనను తక్కువగా చూసినట్టు గత అనుభవాన్ని గుర్తు చేశారు.

ఈ అంశాలపై ఇతర వర్గాల స్పందన లభ్యం కాలేదు.