రాజేంద్రనగర్‌లో బైక్ చోరీలు: 19 ఏళ్ల ఇద్దరు యువకులు అరెస్ట్

హైదరాబాద్ రాజేంద్రనగర్ జోన్‌లో టూ వీలర్ దొంగతనాల కేసులో ఇద్దరు 19 ఏళ్ల యువకులను పోలీసులు అరెస్టు చేశారు. వారి నుంచి దాదాపు 10 వాహనాలను రికవరీ చేసినట్టు పోలీసులు తెలిపారు.

జోన్ పరిధిలో ఇటీవల పలుచోట్ల బైక్‌లు, స్కూటర్లు దొంగతనం అవుతున్నాయి. దీంతో పోలీసులు రాత్రి, పగలు గస్తీ నిర్వహించారు. ఒక అనుమానాస్పద వాహనాన్ని ఆపి విచారించగా, అది దొంగతనం చేసిన వాహనమని పోలీస్ డేటాతో క్రాస్ వెరిఫై చేసి గుర్తించారు.

విచారణలో నిందితులు తమపై ₹70,000 అప్పు ఉందని చెప్పారు. రోజువారీ ఖర్చుల కోసం తీసుకున్న అప్పుకు వడ్డీ కలిపి ఆ మొత్తం అయిందని పోలీసులు తెలిపారు. ఆ అప్పు తీర్చేందుకే వాహనాలు దొంగతనం చేసినట్టు వారు అంగీకరించారు. ఇద్దరు కలిసి దాదాపు 10 వాహనాలు దొంగతనం చేసినట్టు పోలీస్ రికార్డుల్లో తేలింది.

దొంగతనం చేసిన వాహనాలను సగం ధరకు అమ్మినట్టు పోలీసులు చెప్పారు. కొన్ని వాహనాలకు ఒరిజినల్ RC లాగా డూప్లికేట్ RC తయారు చేసి ఇచ్చినట్టు విచారణలో వెల్లడైంది. కొనుగోలు చేసిన వారిలో చాలామంది యువకులే ఉన్నట్టు పోలీసులు తెలిపారు.

ఈ కేసుపై రాజేంద్రనగర్ DCP శ్రీనివాస్ విలేకరుల సమావేశంలో మాట్లాడారు. తమ పిల్లలు ఎక్కడికి వెళ్తున్నారు, ఎవరితో ఉంటున్నారు, ఏ అలవాట్లకు లోనవుతున్నారు అనేది తల్లిదండ్రులు గమనించాలని ఆయన విజ్ఞప్తి చేశారు. 20 ఏళ్లలోపు యువకులు ధూమపానం, గంజాయి వంటి అలవాట్లకు బలవుతున్నారని ఆయన ఆందోళన వ్యక్తం చేశారు. తప్పు అడుగులు వేసినా పోలీసుల సహకారం తీసుకోవాలని సూచించారు.