డ్రగ్స్‌పై రాజకీయాలకు అతీతంగా పోరాడాలి: హైదరాబాద్‌లో కే లక్ష్మణ్ సైకిల్ రైడ్

నశా ముక్త్ భారత్ కార్యక్రమంలో భాగంగా బీజేపీ ఎంపీ డాక్టర్ కే లక్ష్మణ్ హైదరాబాద్‌లోని కేబీఆర్ పార్క్ వద్ద సైకిల్ తొక్కారు. మాదకద్రవ్యాలకు వ్యతిరేకంగా యువతలో అవగాహన కల్పించేందుకు ఈ సైకిల్ రైడ్ చేస్తున్నట్లు ఆయన తెలిపారు.

డ్రగ్స్ నియంత్రణ విషయంలో రాజకీయాలు పక్కనపెట్టి అందరూ కలిసి కృషి చేయాలని ఆయన పిలుపునిచ్చారు. మావోయిజం, నక్సలిజం ముగిసినట్లే మాదకద్రవ్యాలను కూడా అంతం చేయాలని ఆయన అన్నారు. ఈ పోరాటంలో కేంద్ర, రాష్ట్ర ప్రభుత్వాలతో పాటు పౌర సమాజం కూడా ముందుకు రావాలని కోరారు.

కేంద్ర హోం మంత్రి అమిత్ షా మూడేళ్లలో మాదకద్రవ్యాలను అంతం చేయాలని లక్ష్యం నిర్దేశించారని కే లక్ష్మణ్ చెప్పారు. దేశ అభివృద్ధికి యువతే కీలకమని, వారు తప్పుదోవ పట్టకుండా కాపాడుకోవాలని ఆయన పిలుపునిచ్చారు.

నశా ముక్త్ భారత్ కోసం నశా ముక్త్ తెలంగాణ, నశా ముక్త్ హైదరాబాద్ అవసరమని ఆయన అన్నారు. డ్రగ్స్ బారిన పడుతున్న యువతను, వారి తల్లిదండ్రులను అప్రమత్తం చేసే బాధ్యత పౌర సమాజంపైనా ఉందని ఆయన పేర్కొన్నారు.