పి. గన్నవరం టీడీపీలో ఇన్ఛార్జి నియామకం ఆలస్యంపై కార్యకర్తల నిరసన

అంబేద్కర్ కోనసీమ జిల్లా పి. గన్నవరం టీడీపీ కార్యాలయంలో బుధవారం ఉద్రిక్తత నెలకొంది. ఈ నెల 27 నుంచి చేపట్టే డోర్ టు డోర్ కార్యక్రమంపై అవగాహన కోసం జిల్లా అధ్యక్షుడు గుత్తుల సాయి, ప్రధాన కార్యదర్శి గంధం పల్లపు రాజు సమక్షంలో సమావేశం నిర్వహించారు. అయితే నియోజకవర్గానికి ఇన్ఛార్జి నియామకం ఆలస్యం కావడంపై స్థానిక కార్యకర్తలు అసంతృప్తి వ్యక్తం చేశారు.

ప్రభుత్వం అధికారంలోకి వచ్చి రెండేళ్లు గడుస్తున్నా నియోజకవర్గానికి ఇన్ఛార్జిని ప్రకటించలేదని, ఇటీవల జిల్లా ఇన్ఛార్జి మంత్రి అచ్చెన్నాయుడు అభిప్రాయ సేకరణ చేసి 10 రోజులు గడిచినా నిర్ణయం తీసుకోలేదని వారు ఆగ్రహం వ్యక్తం చేశారు. ఒక నియోజకవర్గ నాయకుడికి బదులు త్రీ మ్యాన్ కమిటీని నియమిస్తారన్న ప్రచారం జరగడంతో కార్యకర్తలు నిరసనకు దిగారు.

పి. గన్నవరం నియోజకవర్గంలో మోకా ఆనంద సాగర్, మహాచందన రాజేశ్వరి, దుర్గారావు సుబ్బారావు పేర్లను ఇన్ఛార్జిగా పరిశీలిస్తున్నట్లు సమాచారం. కానీ వీరిలో ఒకరిని ఇన్ఛార్జిగా కాకుండా ముగ్గురితో కూడిన త్రీ మ్యాన్ కమిటీని నియమించాలని యోచిస్తున్నట్లు ప్రచారం రావడంతో ఉద్రిక్తత తలెత్తింది.

నిరసనలు పెరగడంతో జిల్లా నాయకులు ఈ విషయాన్ని అధిష్టానానికి నివేదించి త్వరలోనే నిర్ణయం తీసుకుంటామని హామీ ఇచ్చారు. ఇన్ఛార్జి నియామకంపై ఒకటి రెండు రోజుల్లో స్పష్టత రావొచ్చని వారు తెలిపారు.