వ్యక్తిగత విమర్శలు వద్దని TDP, YSRCP కార్యకర్తలకు సూచనలు

నాయకుల వ్యక్తిగత జీవితాలపై అనుచిత వ్యాఖ్యలు చేయవద్దని TDP, YSRCP తమ శ్రేణులకు సూచించాయి. ఈ మేరకు రెండు పార్టీలు విడివిడిగా ప్రకటనలు చేశాయి.

TDP అనుబంధ ఐటీ విభాగం (ITDP) ఈ విషయంపై ప్రకటన విడుదల చేసింది. కూటమి నాయకులతో పాటు YSRCP నాయకుల వ్యక్తిగత జీవితాలపై కూడా వ్యాఖ్యలు చేయడం ఆమోదయోగ్యం కాదని స్పష్టం చేసింది. నిబంధనలు ఉల్లంఘిస్తే క్రమశిక్షణ చర్యలు తప్పవని హెచ్చరించింది.

మరోవైపు YSRCP కూడా పార్టీ నాయకులు, కార్యకర్తలకు సూచనలు జారీ చేసింది. వ్యక్తిగత విమర్శలకు దూరంగా ఉండాలని, అలాంటి పోస్టులను షేర్ చేయవద్దని పార్టీ తెలిపింది.

చంద్రబాబు, జగన్ ఫోటోలతో వెలువడిన ఈ ప్రకటనలు సోషల్ మీడియాలో వ్యాప్తి చెందుతున్నాయి. రాజకీయ విమర్శలు ప్రజా సమస్యలు, అభివృద్ధి, పాలనపైనే ఉండాలనే సందేశం రెండు పార్టీల ప్రకటనల్లో కనిపిస్తోంది. రాజకీయ విమర్శలు, పరస్పర ఆరోపణలతో ఏపీ రాజకీయాలు వేడెక్కుతున్న తరుణంలో ఈ సూచనలు వెలువడ్డాయి.