1,138 సర్కారు బడుల్లో రీడింగ్ రూమ్స్ ఆధునీకరణకు రూ.1.70 కోట్లు మంజూరు

తెలంగాణ ప్రభుత్వ పాఠశాలల్లో రీడింగ్ రూమ్స్, లైబ్రరీలను ఆధునీకరించేందుకు విద్యాశాఖ నిర్ణయం తీసుకుంది. రాష్ట్రవ్యాప్తంగా ఎంపిక చేసిన 1,138 సర్కారు బడులకు ఒక్కో పాఠశాలకు ₹15,000 చొప్పున మొత్తం ₹1.70 కోట్లు మంజూరు చేసింది.

ఇది ఒకసారి ఇచ్చే వన్ టైమ్ గ్రాంట్. జిల్లా గ్రంథాలయ సంస్థల దగ్గర ఉన్న సెస్ నిధుల నుంచి ఈ మొత్తాన్ని అమ్మ ఆదర్శ పాఠశాల కమిటీల బ్యాంకు ఖాతాలకు ఇప్పటికే బదిలీ చేశారు. పబ్లిక్ లైబ్రరీస్ డిపార్ట్‌మెంట్ సహకారంతో ఈ లైబ్రరీలను కొత్తగా తీర్చిదిద్దాలని విద్యాశాఖ పేర్కొంది.

ఈ గ్రాంట్‌తో లైబ్రరీ గది మరమ్మతులు, పెయింటింగ్, సున్నం వేయడం, విద్యుత్ దీపాలు, ఫ్యాన్ల అమరిక చేపట్టాలి. చదువుకోవడానికి టేబుల్స్, కుర్చీలు, పుస్తకాలను భద్రపరిచే బుక్ రాక్స్, అల్మారాలు కొనుగోలు చేయాలి. మిగిలిన నిధులతో విద్యార్థుల వయసుకు తగిన కథల పుస్తకాలు, ప్రముఖుల జీవిత చరిత్రలు, సైన్స్ పుస్తకాలు, రిఫరెన్స్ గ్రంథాలు సేకరించాలి.

ప్రతి పాఠశాలకు నెలకు ₹1,000 చొప్పున దినపత్రికలు, మ్యాగజైన్ల కోసం కేటాయించారు. కరెంట్ అఫైర్స్, సైన్స్, టెక్నాలజీ, సాహిత్యం, క్రీడలు, పర్యావరణం, జనరల్ నాలెడ్జ్ అంశాలపై తెలుగు, ఇంగ్లీష్ పత్రికలు, జర్నల్స్ కొనుగోలు చేయాలి. లైబ్రరీ గదిలో అందరికీ స్పష్టంగా కనిపించేలా తెలంగాణ పౌర గ్రంథాలయ శాఖ సహకారంతో బోర్డు ఏర్పాటు చేయడం తప్పనిసరి.

ఈ నిధులను లైబ్రరీ అవసరాలకే వాడాలని, జీతాలు లేదా ఇతర ఖర్చులకు మళ్లించకూడదని అధికారులు స్పష్టం చేశారు. పనులకు ముందు, తర్వాత తీసిన ఫోటోలు, బిల్లులను అధికారులకు సమర్పించాలి. పాఠశాల విద్యా డైరెక్టర్ నవీన్ నికోలస్ డీఈఓలు, ఆర్జేడీలకు గైడ్‌లైన్స్ పంపారు. రీడింగ్ రూమ్స్‌ను వెంటనే ఆధునీకరించి అందుబాటులోకి తేవాలని ఆదేశించారు. క్షేత్రస్థాయి అధికారులు లైబ్రరీల పనితీరును నిరంతరం పర్యవేక్షించాలని సూచించారు.