ప్రభుత్వ బడి విద్యార్థులకు పౌష్టికాహారం: తెలంగాణలో బ్రేక్‌ఫాస్ట్ పథకం

తెలంగాణ ప్రభుత్వం ప్రభుత్వ పాఠశాలల విద్యార్థుల కోసం కొత్తగా బ్రేక్‌ఫాస్ట్ పథకాన్ని అమలు చేస్తోంది. రాష్ట్ర వ్యాప్తంగా 23 వేలకు పైగా స్కూళ్లలో చదివే 20 లక్షల మంది విద్యార్థులకు ఈ పథకం వర్తిస్తుంది. ఉదయం పూట పౌష్టికాహారం అందించడం దీని లక్ష్యం.

వరంగల్ ఏనుమాముల వ్యవసాయ మార్కెట్‌లో ఏర్పాటు చేసిన సెంట్రలైజ్డ్ కిచెన్ ద్వారా ఈ భోజనం తయారవుతుంది. హరేకృష్ణ ఫౌండేషన్ ఈ కేంద్రాన్ని నిర్వహిస్తోంది. రోజూ తెల్లవారుజామున 3 గంటల నుంచే వంట ప్రక్రియ మొదలై, స్కూళ్లు తెరిచే సమయానికి వేడి వేడి ఆహారాన్ని విద్యార్థులకు చేరవేస్తారు.

వారంలో ప్రతిరోజూ భిన్నమైన మెనూను అందిస్తున్నారు. సోమవారం దోశ, సాంబార్, చట్నీ; మంగళవారం మిల్లెట్ ఇడ్లీ, సాంబార్; బుధవారం పూరీ, మిక్స్డ్ వెజిటేబుల్ కుర్మా; గురువారం బోండా, సాంబార్, చట్నీ; శుక్రవారం ఇడ్లీ, సాంబార్, చట్నీ; శనివారం ఉప్మా, సాంబార్, చట్నీ ఇవ్వడం జరుగుతుంది. దీనికి తోడు పాలు, రాగి జావా కూడా అందజేస్తున్నారు.

పథకం ప్రారంభించిన తర్వాత విద్యార్థుల హాజరు శాతం పెరిగిందని ఉపాధ్యాయులు తెలిపారు. గతంలో ఖాళీ కడుపుతో వచ్చిన పిల్లలు ప్రార్థన సమయంలో కళ్ళు తిరిగి పడిపోయేవారని, ఇప్పుడా సంఘటనలు దాదాపుగా లేవని చెప్పారు. విద్యార్థులు తరగతి గదిలో ఏకాగ్రతతో పాఠాలు వినడం మెరుగైందని, క్రమశిక్షణ అలవాటైందని వారు వివరించారు.

చాలా మంది విద్యార్థులు ఇంట్లో టిఫిన్ చేయకుండానే స్కూలుకు వచ్చేవారని, బ్రేక్‌ఫాస్ట్ పథకం వల్ల వారికి పౌష్టికాహారం లభిస్తోందని టీచర్లు తెలిపారు. పేద కుటుంబాల పిల్లలు ప్రత్యేకంగా లబ్ధి పొందుతున్నారని, తల్లిదండ్రులు కూడా సంతోషంగా పిల్లల్ని బడికి పంపిస్తున్నారని వారు జోడించారు.

720 కోట్ల రూపాయల బడ్జెట్‌తో ఈ బ్రేక్‌ఫాస్ట్ పథకాన్ని రాష్ట్ర ప్రభుత్వం అమలు చేస్తోంది. మిడ్‌డే మీల్స్‌తో పాటు ఇప్పుడు ఉదయపు టిఫిన్ కూడా జోడించడంతో విద్యార్థుల ఆరోగ్యంపై సానుకూల ప్రభావం కనిపిస్తోందని బోధనా సిబ్బంది చెప్పారు.