మూసీ అభివృద్ధి ప్రాజెక్టుకు తొలి దశ ఆమోదం: తెలంగాణ క్యాబినెట్ కీలక నిర్ణయాలు

తెలంగాణ క్యాబినెట్ సమావేశంలో మూసీ రివర్ ఫ్రంట్ డెవలప్మెంట్ ప్రాజెక్టుకు తొలి దశ పనులకు ఆమోదం లభించింది. సీఎం రేవంత్ రెడ్డి అధ్యక్షతన జరిగిన ఈ సమావేశంలో మొదటి దశలో రూ.7,345 కోట్లతో 21 కిలోమీటర్ల మేర అభివృద్ధి పనులు చేపట్టాలని నిర్ణయించారు. హిమాయత్ సాగర్ నుంచి బాపు ఘాట్ వరకు ఈ పనులు కొనసాగుతాయి. ప్రాజెక్టు పర్యవేక్షణ కోసం 147 కొత్త పోస్టులు ఏర్పాటు చేస్తూ, ఇతర శాఖల నుంచి డిప్యూటేషన్ పై సిబ్బందిని తీసుకోవడానికి క్యాబినెట్ అనుమతి ఇచ్చింది.

టిమ్స్ (TIMS) ఆసుపత్రులు, వరంగల్ సూపర్ స్పెషాలిటీ ఆసుపత్రిలో 6,278 వైద్య సిబ్బంది పోస్టుల భర్తీకి ఆమోదం తెలిపారు. ఇందులో 1,494 రెగ్యులర్, 549 కాంట్రాక్టు, 4,235 అవుట్‌సోర్సింగ్ పోస్టులు ఉన్నాయి. ఈ ఆసుపత్రులను నిమ్స్ తరహాలో అభివృద్ధి చేయాలనే నిర్ణయం తీసుకున్నారు. అర్హులైన రోగులకు సీఎం రిలీఫ్ ఫండ్ నుంచి ఎల్ఓసీలు మంజూరు చేయాలని సీఎం ఆదేశించారు.

ప్రభుత్వ పాఠశాలలు, జూనియర్ కళాశాలల్లో విద్యార్థులతో పాటు సుమారు 1.50 లక్షల మంది ఉపాధ్యాయులు, లెక్చరర్లు, సిబ్బందికి అల్పాహారం, పాలు, మధ్యాహ్న భోజనం అందించే ప్రతిపాదనను కూడా క్యాబినెట్ ఆమోదించింది. అదనంగా, నిత్యావసర వస్తువుల గోదాములు, జవహర్ నవోదయ విద్యాలయాల కోసం భూముల కేటాయింపులకు ఆమోదం తెలిపారు. హైదరాబాద్ లో కేంద్ర రక్షణ శాఖ భూములు రాష్ట్రానికి అప్పగించే నేపథ్యంలో గాంధీ సరోవర్ ప్రాజెక్టుకు సైతం అనుమతి లభించింది.