డ్రగ్స్ నిర్మూలన కోసం తిరుపతి ఆటో డ్రైవర్లు 'యువ రథం' యాత్ర ప్రారంభం

తిరుపతి రైల్వే స్టేషన్ వద్దనున్న సుదర్శన్ ఆటో స్టాండ్కు చెందిన 103 మంది ఆటో డ్రైవర్లు డ్రగ్స్, మత్తు పదార్థాల వాడకంపై అవగాహన యాత్రను ప్రారంభించారు. లైంగిక దాడులు, మద్యం సేవించి వాహనం నడపడం వంటి సమస్యలపై ప్రచారం చేయడం లక్ష్యం.

ఈ యాత్రకు 'యువ రథం' అని పేరు పెట్టారు. ఆంధ్రప్రదేశ్, తెలంగాణ, కర్ణాటక, కేరళ, తమిళనాడు రాష్ట్రాల గుండా మొత్తం 3,570 కిలోమీటర్లు ప్రయాణించనున్నారు. ప్రతి ప్రాంతంలో అక్కడి ఆటో డ్రైవర్లను కలిసి మాట్లాడతారు.

మద్యం తాగి వాహనం నడపవద్దని, ప్రయాణికుల పట్ల మర్యాదగా ఉండాలని, ఎక్కువ మందిని ఎక్కించవద్దని సూచిస్తారు. అధికారులు సూచించిన నిబంధనలు పాటించాలని, దొరికిన వస్తువులు అప్పగించాలని కూడా చెప్తారు.

యాత్ర ఖర్చులను డ్రైవర్లే స్వయంగా భరిస్తున్నారు. తమ రోజువారీ ఆటో ఆదాయం నుంచి నిధులు సమకూర్చుకుంటున్నట్టు నిర్వాహకులు తెలిపారు. గతంలో జాతీయ జెండాతో ఆటో యాత్ర, మద్యపాన నియంత్రణ ప్రచారం వంటి కార్యక్రమాలు చేపట్టినట్టు వారు చెప్పారు.

ఈ కార్యక్రమానికి నారా లోకేశ్ యువగళం యాత్ర స్ఫూర్తిగా నిలిచిందని ఒక నిర్వాహకుడు పేర్కొన్నాడు. తమిళనాడు మీదుగా తిరిగి తిరుపతికి చేరుకుంటామని వారు తెలిపారు.