SIR ప్రక్రియపై తెలంగాణ సీఈవో సుదర్శన్ రెడ్డి వివరణ

సోమాజిగూడ ప్రెస్ క్లబ్‌లో తెలంగాణ రాష్ట్ర ఎన్నికల ప్రధాన అధికారి (CEO) సుదర్శన్ రెడ్డి మీడియాతో మాట్లాడారు. స్పెషల్ ఇంటెన్సివ్ రివిజన్ (SIR) ప్రక్రియపై వివరాలు ఇచ్చారు.

ఎలక్టోరల్ రోల్‌ను పూర్తిగా శుద్ధి చేసి కొత్తగా తయారు చేయడమే SIR లక్ష్యమని ఆయన చెప్పారు. చనిపోయిన వారి పేర్లు తొలగించడం, వివరాలు సరిచేయడం కోసం ఇది చేపడుతున్నామని వివరించారు.

ఎన్యుమరేషన్ దశ జూన్ 24 నుంచి జూలై 24 వరకు కొనసాగుతుంది. ఈ సమయంలో ప్రతి ఓటరుకు ప్రీ-ఫిల్డ్ ఎన్యుమరేషన్ ఫారమ్ ఇంటికి చేరుతుంది. తెలంగాణలో 3.38 కోట్ల మంది ప్రస్తుత ఓటర్లకు ఈ ఫారమ్‌లు ముద్రించామని ఆయన తెలిపారు.

ప్రతి ఫారమ్‌లో ఓటరు పేరు, చిరునామా, ఐడీ, పాత ఫోటోతోపాటు కొత్త ఫోటో కోసం స్థలం ముందే నింపి ఉంటాయి. మూడు బాక్స్‌లు ఉంటాయి. 2002లో ఓటరుగా ఉన్న వ్యక్తులు మొదటి బాక్స్‌లో అప్పటి వివరాలు నింపాలి. 2002లో ఓటరు కాని వారు రెండవ బాక్స్‌లో తమ తల్లిదండ్రులు/గ్రాండ్ పేరెంట్స్‌లో 2002లో ఓటరుగా ఉన్న వారి వివరాలు ఇవ్వాలి. మూడవ బాక్స్‌లో ప్రస్తుత వివరాలు నింపాలి. తల్లిదండ్రులు కూడా 2002లో ఓటర్లు కాకపోతే ఆ బాక్స్‌లను ఖాళీగా ఉంచవచ్చు.

తెలంగాణలో గతంలో 2002లో SIR జరిగింది. ప్రస్తుతం 17 రాష్ట్రాలతోపాటు మన రాష్ట్రంలోనూ SIR చేపడుతున్నారు. కొత్త ఎన్నికల కమిషనర్ గణేష్ కుమార్ నిర్ణయంతో ఈ ప్రక్రియ మొదలైంది. తెలంగాణ, పంజాబ్‌లు కలిసి చేస్తుండగా, ఆంధ్రప్రదేశ్‌లో పది రోజుల తర్వాత, కర్ణాటక, మహారాష్ట్రల్లో ఐదు రోజుల తర్వాత ప్రారంభం అవుతుందని సుదర్శన్ రెడ్డి తెలిపారు.