పాలకుర్తి, కామారెడ్డి అంతర్గత తగాదాలపై టీపీసీసీ క్రమశిక్షణ కమిటీ నోటీసులు

హైదరాబాద్ లోని గాంధీ భవన్లో మల్లు రవి అధ్యక్షతన కాంగ్రెస్ క్రమశిక్షణ కమిటీ సమావేశమైంది. ఈ సమావేశంలో పాలకుర్తి నియోజకవర్గంలో నాయకుల మధ్య విభేదాలతో పాటు కామారెడ్డికి చెందిన సీనియర్ నేత షబ్బీర్ అలీపై చేసిన వ్యాఖ్యల విషయంలో ఫిర్యాదులను విచారించారు.

పాలకుర్తి ఎమ్మెల్యే యశస్విని రెడ్డి హరిప్రసాద్, కృష్ణ కిషోర్ లపై పార్టీ వ్యతిరేక కార్యకలాపాలకు పాల్పడ్డారంటూ ఫిర్యాదు చేశారు. మరోవైపు హరిప్రసాద్, కృష్ణ కిషోర్ వర్గం జాన్సీ రెడ్డిని షాడో ఎమ్మెల్యేగా అభివర్ణిస్తూ పార్టీ నాయకత్వాన్ని పట్టించుకోవడం లేదని, పార్టీ వ్యతిరేక కార్యకలాపాలను ప్రోత్సహిస్తున్నారని ఆరోపించింది. దీంతో కమిటీ ఇరువర్గాలకు నోటీసులు జారీ చేసింది. యశస్విని రెడ్డి ఇప్పటికే విదేశీ పర్యటన నుంచి తిరిగి వచ్చి కమిటీ ముందు హాజరయ్యారు.

కామారెడ్డి వ్యవహారంలో తెలంగాణ పీసీసీ జనరల్ సెక్రటరీ గడ్డం చంద్రశేఖర్ రెడ్డి మాజీ మంత్రి షబ్బీర్ అలీని ఉద్దేశించి ‘ముసలి నక్క’ అని పరుష పదజాలం వాడారని, ఆయన ఇతర పార్టీ అభ్యర్థులకు మద్దతు ఇస్తున్నారని షబ్బీర్ అలీ వర్గం ఫిర్యాదు చేసింది. ఈ మేరకు చంద్రశేఖర్ రెడ్డిపై చర్యలు తీసుకోవాలని కోరారు.

కమిటీ రెండు వ్యవహారాలపై విచారణ కొనసాగిస్తుందని, తదుపరి దశలో పూర్తి స్థాయి తీర్పు ఇవ్వనుందని పార్టీ వర్గాలు తెలిపాయి.