పార్లమెంట్‌ సమాధానంలో తెలంగాణ అప్పు వివరాలు: కేసీఆర్ హయాంలో కొత్త అప్పు ₹2.8 లక్షల కోట్లు

తెలంగాణ రాష్ట్ర అప్పులపై కేంద్ర ఆర్థిక శాఖ సహాయ మంత్రి పంకజ్ చౌదరి పార్లమెంట్లో లిఖిత సమాధానం ఇచ్చారు. మెదక్ ఎంపీ రఘునందన్ రావు అడిగిన ప్రశ్నకు సమాధానంగా ఈ వివరాలు ఇచ్చారు.

2014లో రాష్ట్రం ఏర్పడినప్పుడు తెలంగాణ వాటాగా వచ్చిన అప్పు ₹69,603 కోట్లు. అప్పట్లో ఆస్తులు ₹83,143 కోట్లు. కేసీఆర్ ప్రభుత్వం ముగిసే 2023–24 నాటికి మొత్తం అప్పు ₹3.5 లక్షల కోట్లకు చేరింది. అంటే ప్రారంభ అప్పు తీసివేస్తే కొత్తగా చేసిన అప్పు దాదాపు ₹2.8 లక్షల కోట్లు. ఇదే సమయంలో రాష్ట్ర ఆస్తులు ₹4.5 లక్షల కోట్లకు పెరిగినట్లు మంత్రి తెలిపారు.

ఈ లెక్కలు రాష్ట్ర ప్రభుత్వం ఇంతకు ముందు చెప్పిన అప్పు సంఖ్యలకు భిన్నంగా ఉన్నాయి. సీఎం రేవంత్ రెడ్డి అధికారంలోకి వచ్చాక అప్పు ₹7 లక్షల కోట్ల వరకు ఉన్నట్లు పవర్‌పాయింట్ ప్రెజెంటేషన్ ఇచ్చిన సంగతి గుర్తుండాలి. అయితే పార్లమెంట్ జవాబు ప్రకారం మొత్తం అప్పు రూ.3.5 లక్షల కోట్లు కావడం, ఆస్తుల విలువ అప్పు కంటే ఎక్కువగా ఉండటం విశేషం.

బీజేపీ నాయకులు వీధి స్థాయిలో కేసీఆర్ అప్పులు చేసి అవినీతికి పాల్పడ్డారని విమర్శిస్తూనే, పార్లమెంట్‌లో మాత్రం ఆస్తులు ఎక్కువగా పెరిగాయని అధికారికంగా సమాధానం ఇవ్వడం గమనార్హం. దీనిపై రాజకీయ వివాదం కొనసాగుతోంది. కేసీఆర్‌ను అసెంబ్లీకి రప్పించి చర్చించాలని కాంగ్రెస్ కోరుతోంది. ఈ విషయంపై బీఆర్ఎస్, కాంగ్రెస్, బీజేపీల మధ్య విభిన్న వాదనలు వినిపిస్తున్నాయి.