తెలంగాణలో డయల్ 100 స్థానంలో డయల్ 112 సేవలు ప్రారంభం; అన్ని ఎమర్జెన్సీలకు ఒకే నెంబర్

తెలంగాణలో ఇక అన్ని అత్యవసర సేవలకు ఒకే నెంబర్‌గా డయల్‌ 112 అందుబాటులోకి వచ్చింది. రాష్ట్ర డీజీపీ సీవీ ఆనంద్ సోమవారం కమాండ్ అండ్ కంట్రోల్ సెంటర్‌లో ఈ ఏఐ ఆధారిత నెక్స్ట్ జనరేషన్ సేవను ప్రారంభించారు. ఇప్పటి వరకు పోలీసు సహాయం కోసం ఉన్న డయల్ 100 స్థానంలో ఈ కొత్త వ్యవస్థ వస్తోంది.

డయల్‌ 112 ద్వారా పోలీస్, ఫైర్, అంబులెన్స్, మహిళా భద్రత, విపత్తు నిర్వహణ వంటి 18 రకాల సేవలను ఒకే వేదికపైకి తీసుకొచ్చినట్లు డీజీపీ తెలిపారు. కేంద్ర ప్రభుత్వం ‘ఒకే దేశం, ఒకే అత్యవసర నంబర్’ విధానానికి అనుగుణంగా 112ను ప్రామాణికం చేస్తున్నామని ఆయన వివరించారు.

కొత్త వ్యవస్థలో ఏఐ ఆధారిత కాల్ ఫిల్టరింగ్, వాయిస్ టు టెక్స్ట్ సదుపాయం, లొకేషన్ బేస్డ్ మ్యాపింగ్ వంటి సాంకేతికతలను వినియోగించారు. దీనివల్ల స్పామ్ కాల్స్ ముందుగానే గుర్తిస్తారు. 94 శాతం కాలర్ల లొకేషన్ ఖచ్చితంగా తెలుసుకునే సామర్థ్యం ఉందని అధికారులు తెలిపారు. ఫలితంగా కాల్ టేకర్ సమయం 100 సెకండ్ల నుంచి 69 సెకండ్లకు, డిస్పాచ్ సమయం 90 నుంచి 64 సెకండ్లకు తగ్గింది. మొత్తం కాల్ సెంటర్ ప్రాసెసింగ్ సమయం దాదాపు 30 శాతం తగ్గుతుందని అంచనా.

ప్రస్తుతం పట్టణాల్లో సగటు స్పందన సమయం 6 నిమిషాలు, గ్రామీణ ప్రాంతాల్లో 15 నిమిషాలు, రాష్ట్ర సగటు 10 నిమిషాల 30 సెకన్లు. ఇది జాతీయ సగటు కంటే మెరుగైన పనితీరుగా అధికారులు పేర్కొంటున్నారు. 31 పోలీస్ యూనిట్ల పరిధిలోని 1,860 పెట్రోలింగ్ వాహనాలను డిజిటల్‌గా ఈ వ్యవస్థతో అనుసంధానించారు.

భవిష్యత్తులో హైదరాబాద్, సైబరాబాద్, మల్కాజగిరి, ఫ్యూచర్‌ సిటీ కమిషనరేట్లలో డ్రోన్లను ఏరియల్ ఫస్ట్ రెస్పాండర్లుగా వినియోగించే ప్రణాళిక కూడా సిద్ధమైంది. 2013లో కొంపల్లిలో జీవీకే ఈఎంఆర్‌ఐ సహకారంతో ప్రారంభమైన డయల్ 100 సేవలు ఇప్పుడు పూర్తి స్థాయి ఏఐ వ్యవస్థగా అప్‌గ్రేడ్ అయ్యాయి.