వరంగల్‌లో తెలంగాణ డీజీపీ భద్రతా సమీక్ష సమావేశం

తెలంగాణ డీజీపీ సీవీ ఆనంద్ ఉమ్మడి వరంగల్ జిల్లాలో పర్యటిస్తున్నారు. నిన్న సాయంత్రం వరంగల్ చేరుకున్న ఆయనకు పోలీస్ కమిషనర్ శ్వేతా రెడ్డి, జనగామ జిల్లా కలెక్టర్ సందీప్ కుమార్, ఇతర అధికారులు స్వాగతం పలికారు.

వరంగల్ కమిషనరేట్ పరిధిలోని మూడు జిల్లాల అధికారులతో డీజీపీ సమీక్ష సమావేశం నిర్వహించారు. ఈ సమావేశంలో డీసీపీలు, ఏఎస్పీలు, స్టేషన్ హౌస్ ఆఫీసర్లు పాల్గొన్నారు. నేరాలు, సైబర్ క్రైమ్, పోలీసింగ్, పెట్రోలింగ్ తదితర అంశాలను సమీక్షించి, అధికారులకు దిశానిర్దేశం చేశారు.

మామునూరు నాలుగో పోలీస్ బెటాలియన్‌ను డీజీపీ సందర్శించారు. నేడు ములుగు, భూపాలపల్లి, మహబూబాబాద్ జిల్లాల్లో సమీక్ష సమావేశాలు నిర్వహించనున్నారు. డ్రగ్స్ నివారణ, నేరాల నియంత్రణ, భూ వివాదాలు, పోలీసులు–ప్రజల మధ్య సంబంధాలు ప్రధానంగా చర్చించనున్నారు.