యూరియా యాప్ సమస్యలతో తెలంగాణ రైతుల అసంతృప్తి, మాన్యువల్ పంపిణీ డిమాండ్

తెలంగాణలో యూరియా బుకింగ్ యాప్ సరిగ్గా పనిచేయడం లేదని రైతులు ఆందోళన వ్యక్తం చేస్తున్నారు. యాప్ ఓపెన్ కావడం లేదని, స్టాక్ క్షణాల్లో ఖాళీ అవుతోందని వారు చెబుతున్నారు. బుకింగ్ తర్వాత రిసీట్ రావడం లేదు, వివరాలు మ్యాచ్ కాకపోవడం వంటి సమస్యలు ఉన్నాయి. ఎరువుల దుకాణాల యజమానులు తమ సన్నిహితులకు ప్రత్యేకంగా బుకింగ్ చేయిస్తున్నారనే ఆరోపణలు కూడా ఉన్నాయి. దీంతో యాప్ రద్దు చేసి మాన్యువల్ పంపిణీ విధానం తిరిగి తేవాలని రైతులు డిమాండ్ చేస్తున్నారు.

ప్రభుత్వం ప్రవేశపెట్టిన ఈ యాప్‌ను మొదట నిజామాబాద్, కామారెడ్డి, కరీంనగర్, నల్లగొండ జిల్లాలకు అందుబాటులోకి తెచ్చారు. ఈ నెల 14న సంగారెడ్డి, 15న సిద్దిపేట, 18న యాదాద్రి భువనగిరి జిల్లాలకు యాప్ సదుపాయం విస్తరించారు. అయితే జిల్లాల్లోని అన్ని మండలాలకు యాప్ ద్వారా బుకింగ్ ఇవ్వడం లేదని, కొన్ని మండలాలకే పరిమితం చేసినట్లు సమాచారం. రోజులో ఉదయం ఆరు గంటలకు, మధ్యాహ్నం మూడు గంటలకు మాత్రమే స్టాక్ పెడుతున్నప్పటికీ, నిమిషాల్లో నో స్టాక్ బోర్డు కనిపిస్తుందని రైతులు చెబుతున్నారు.

మార్క్ఫెడ్ వద్ద ప్రస్తుతం 5 లక్షల టన్నుల బఫర్ స్టాక్ అవసరం కాగా, 2.15 లక్షల టన్నులు మాత్రమే ఉన్నట్లు అధికార వర్గాలు తెలిపాయి. ప్రైవేట్ డీలర్ల వద్ద మరో లక్ష టన్నులు ఉన్నట్లు సమాచారం. వర్షాలు మొదలైతే 15 నుంచి 20 రోజుల్లోనే స్టాక్ ఖాళీ అవుతుందని, మళ్లీ కొరత తలెత్తే ప్రమాదం ఉందని అధికారులు ఆందోళన వ్యక్తం చేస్తున్నట్లు తెలిసింది.