తెలంగాణ తొలి ఈ-క్యాబినెట్ సమావేశం నేడు: సీఎం రేవంత్ రెడ్డి అధ్యక్షత

తెలంగాణ రాష్ట్రంలో మొట్టమొదటి పేపర్లెస్ క్యాబినెట్ సమావేశం ఇవాళ మధ్యాహ్నం 3 గంటలకు జరగనుంది. ముఖ్యమంత్రి రేవంత్ రెడ్డి అధ్యక్షతన సచివాలయంలో ఈ డిజిటల్ క్యాబినెట్ భేటీ ప్రారంభమవుతుంది. మంత్రులకు ఈ నెల ప్రారంభంలోనే టాబ్లెట్లు అందజేసి, వాటి వినియోగంపై ఒక రోజు శిక్షణ ఇచ్చినట్లు అధికారులు తెలిపారు. కొత్త ప్రధాన కార్యదర్శి సంజయ్ జాజుకు ఇదే తొలి క్యాబినెట్ సమావేశం.

ఈ భేటీలో పలు కీలక అంశాలపై మంత్రివర్గం చర్చించనుంది. గ్రామీణ ఉపాధి హామీ పథకం (ఎంజీఎన్‌రేగా) స్థానంలో కేంద్ర ప్రభుత్వం తీసుకురాబోతున్న కొత్త పథకాన్ని తెలంగాణలో అమలు చేయాలా వద్దా అనే విషయంపై మంత్రులు సమీక్షించనున్నారు. విద్యార్థుల ఫీజ్ రియంబర్స్మెంట్ విధానంలో అవసరమైన మార్పులు, నిధుల విడుదల తదితర అంశాలపై చర్చించి నిర్ణయం తీసుకుంటారు.

వ్యవసాయం, సాగు నీటి నిర్వహణపై కూడా మంత్రివర్గం దృష్టి పెట్టనుంది. ఎల్నీనో ప్రభావాన్ని దృష్టిలో ఉంచుకుని ప్రత్యామ్నాయ పంటల సాగు, సాగునీటి ప్రాజెక్టుల నిర్వహణపై చర్చ జరిగే అవకాశం ఉంది. మెట్రో రైల్ రెండో దశ విస్తరణ పనుల పురోగతి, మూసీ నది ప్రక్షాళన ప్రాజెక్ట్ డీపీఆర్ ఆమోదంపై నిర్ణయం తీసుకోనున్నారు. అలాగే, కొన్ని నియోజకవర్గాల్లో నిజమైన ఓటర్ల ఓటు హక్కు కోల్పోకుండా చూసేందుకు తీసుకోవాల్సిన చర్యలపై సమాలోచన చేపట్టనున్నట్టు సమాచారం.