తుమ్మిడిహట్టి ఆనకట్ట ప్రీ ఫీజిబిలిటీ రిపోర్ట్‌పై తెలంగాణ ప్రభుత్వం ఫోకస్

తుమ్మిడిహట్టి వద్ద ఆనకట్ట నిర్మాణానికి సంబంధించి తెలంగాణ ప్రభుత్వం కసరత్తు వేగవంతం చేసింది. ఇది కాంగ్రెస్ ప్రభుత్వం ఎన్నికల్లో ఇచ్చిన హామీకి అనుగుణంగా, ప్రాణహిత-చేవెళ్ల ప్రాజెక్టును పునరుద్ధరించే దిశగా తీసుకున్న చర్యగా భావిస్తున్నారు. ప్రభుత్వ ఆదేశాలతో ఆర్వి అసోసియేట్స్ సంస్థ ఈ ప్రాజెక్టుకు సంబంధించిన ప్రీ ఫీజిబిలిటీ నివేదికను సిద్ధం చేసి అందించింది.

ఈ నివేదిక ప్రకారం, వైన్‌గంగా, వార్ధా నదులపై రెండు వేర్వేరు బ్యారేజీలను నిర్మించి, వాటిని కాంక్రీట్ బండతో అనుసంధానించాలని ప్రతిపాదించారు. ఆనకట్ట ఎత్తు 152 మీటర్లకు చేరుకుంటే 165 టీఎంసీల నీరు లభ్యమవుతుంది. 148 మీటర్ల ఎత్తుకు 58 టీఎంసీలు, 149 మీటర్లకు 80 టీఎంసీలు, 150 మీటర్లకు 129 టీఎంసీల నీటి లభ్యత ఉంటుందని నివేదిక తెలిపింది.

నీటి తరలింపు మార్గం విషయంలో, తుమ్మిడిహట్టి నుంచి మైలారం వరకు ఉన్న 71.55 కిలోమీటర్ల కాలువను వినియోగించుకోవడంతోపాటు, బొగ్గు బ్లాకులున్న ప్రాంతాన్ని తాకకుండా కొత్త అలైన్మెంట్ సూచించినట్లు తెలిసింది. ఇందులో 22 కిలోమీటర్ల సొరంగ మార్గం, 5 కిలోమీటర్ల ఓపెన్ కెనాల్ ద్వారా సుందీళ్ళ జలాశయానికి నీటిని చేరవేయాలని ప్రతిపాదించారు.

నీటిపారుదల శాఖ ఈ నివేదికపై కొన్ని మార్పులు సూచించింది. నీటి లభ్యత విషయాలకు మాత్రమే నివేదికను పరిమితం చేయాలని, అదనపు అంశాలను తొలగించాలని, అలాగే నిర్మాణ వ్యయాలతో సహా ఆర్థిక అంశాలను చేర్చాలని సూచించింది. ఆర్వి అసోసియేట్స్ ఈ మార్పులు చేసి, త్వరలోనే సవరించిన నివేదికను ప్రభుత్వానికి సమర్పించనుంది. మరోవైపు, ఈ ప్రాజెక్టు విషయంలో వీలైనంత త్వరగా మహారాష్ట్ర ప్రభుత్వంతో చర్చలు జరపాలని రాష్ట్ర ప్రభుత్వం భావిస్తోంది.