ప్రభుత్వ ఉద్యోగులు, పెన్షనర్లకు హెల్త్ కార్డులు: డిప్యూటీ సీఎం భట్టి విక్రమార్క

తెలంగాణ ప్రభుత్వం రాష్ట్ర ప్రభుత్వ ఉద్యోగులు, పెన్షనర్ల కోసం కొత్త ఆరోగ్య పథకాన్ని ప్రారంభించింది. డిప్యూటీ సీఎం భట్టి విక్రమార్క, ఆరోగ్య మంత్రి దామోదర రాజనరసింహ ఈ పథకాన్ని సచివాలయంలో ప్రారంభించారు.

17,88,000 మంది లబ్ధిదారులకు ఈ పథకం ద్వారా ఆరోగ్య భద్రత కల్పిస్తున్నామని భట్టి విక్రమార్క తెలిపారు. అపోల్, కిమ్స్, మెడికవర్ వంటి కార్పొరేట్ ఆసుపత్రులతో పాటు రాష్ట్రవ్యాప్తంగా 886 ప్రైవేట్, 114 ప్రభుత్వ ఆసుపత్రుల్లో క్యాష్లెస్ చికిత్స అందుబాటులో ఉంటుందని మంత్రి దామోదర రాజనరసింహ చెప్పారు. ఉద్యోగులు, వారి కుటుంబ సభ్యులకు వైద్య ఖర్చులను ట్రస్ట్ ద్వారా ప్రభుత్వం చెల్లిస్తుందని భట్టి విక్రమార్క వివరించారు.

2007లో ఆరోగ్యశ్రీ ట్రస్ట్ తర్వాత, ఇప్పుడు ఉద్యోగులకు కూడా ఇలాంటి భద్రత కల్పించడం ఒక మైలురాయి అని భట్టి విక్రమార్క పేర్కొన్నారు. వచ్చే 12 నెలల్లో అన్ని ఈఎస్ఐ ఆసుపత్రులను అప్‌గ్రేడ్ చేస్తామని రాష్ట్ర మంత్రి వివేక్ తెలిపారు.