తెలంగాణ ప్రభుత్వం ఆగస్టు 15 నుంచి కొత్త ఆసరా పెన్షన్ల మంజూరు

తెలంగాణ ప్రభుత్వం ఈ నెల 15వ తేదీ నుంచి కొత్త ఆసరా పెన్షన్లను మంజూరు చేయాలని ఆదేశించింది. అధికారులు ప్రస్తుతం దరఖాస్తులు స్వీకరిస్తున్నారు.

పెన్షన్ మంజూరులో కొన్ని కేటగిరీలకు ప్రాధాన్యత ఇవ్వాలని ప్రభుత్వం కోరింది. ఒంటరి మహిళలు, వితంతువులు, బీడీ/చేనేత కార్మికులు, ఫైలేరియా/డయాలసిస్ బాధితులు, దివ్యాంగులు, తలసేమియా, సికిల్ సెల్, హీమోఫీలియా రోగులు ముందుగా పెన్షన్ పొందే అవకాశం ఉంది.

ఇదివరకే పెన్షన్ పొందుతున్న లబ్ధిదారులలో లక్ష మందికి పైగా అనర్హులుగా ప్రభుత్వ సర్వేలో తేలింది. మరణించిన వారు, డూప్లికేట్ పేర్లు, ఇతర రాష్ట్రాలకు మకాం మార్చిన వారు వీరిలో ఉన్నారు. ఈ అనర్హులను తొలగించి 1.5 లక్షల మందికి కొత్త పెన్షన్లు ఇవ్వాలని ప్రభుత్వం నిర్ణయించింది.

అర్హత నిబంధనల ప్రకారం, గ్రామీణ ప్రాంతంలో వార్షిక ఆదాయం రూ.1.5 లక్షలు, పట్టణాల్లో రూ.2 లక్షలు మించకూడదు. నాలుగు చక్రాల వాహనం ఉన్నవారు, ప్రభుత్వ/ప్రైవేట్/అవుట్‌సోర్సింగ్ ఉద్యోగులు అర్హులు కాదు. దరఖాస్తుకు ఎటువంటి గడువు లేదు. అర్హులు గ్రామ / వార్డు కార్యదర్శుల ద్వారా దరఖాస్తు చేసుకోవచ్చు. ఈ ప్రక్రియ కొనసాగుతుందని ప్రభుత్వం తెలిపింది.