మేడిగడ్డ సహా మూడు బ్యారేజ్ల పునరుద్ధరణ: జియో టెక్నికల్ ఫలితాల తర్వాతే నిర్ణయం

తెలంగాణలో కాళేశ్వరం ప్రాజెక్టుకు సంబంధించిన మేడిగడ్డ, అన్నారం, సుందిళ్ల బ్యారేజీల పునరుద్ధరణ జియో టెక్నికల్ పరీక్షల ఫలితాలు వచ్చాకే చేపట్టాలని ప్రభుత్వం నిర్ణయించింది.

ఇప్పటికే గ్రౌండ్ పెనెట్రేటింగ్ రాడార్ (GPR) పరీక్షలు పూర్తయ్యాయి. మేడిగడ్డ బ్యారేజీలో ఏడో బ్లాక్ లోనే ఎక్కువగా సమస్యలు ఉన్నాయని ఆ నివేదిక తేల్చింది. గతంలో నేషనల్ డ్యామ్ సేఫ్టీ అథారిటీ (NDSA) కూడా ఈ బ్లాకును పూర్తిగా తొలగించడం లేదా ప్రత్యామ్నాయం చూడాలని సిఫారసు చేసింది. మరో రెండు బ్లాక్లలోనూ అసాధారణ పరిస్థితి ఉన్నట్లు గుర్తించారు.

అన్నారం బ్యారేజీలో ఒక వెంట్ వద్ద మాత్రమే సమస్య ఉన్నట్లు GPR నివేదిక పేర్కొంది. సుందిళ్ల బ్యారేజీలో మూడు వెంట్లపై ప్రాథమిక ప్రస్తావన ఉన్నప్పటికీ, తుది నిర్ధారణలో సమస్య లేనట్లు నివేదిక తేల్చింది.

జియో టెక్నికల్ పరీక్షలకు అవసరమైన నమూనాలను 75 మీటర్ల లోతు వరకు డ్రిల్లింగ్ చేసి సేకరించారు. వాటి ఫలితాలు, స్ట్రక్చరల్ అనాలసిస్ నివేదికలు రావాల్సి ఉంది. వీటి ఆధారంగా డిజైన్లను ఖరారు చేయాలని, పునరుద్ధరణ చర్యలు చేపట్టాలని నీటిపారుదల శాఖ భావిస్తోంది.

ఇటీవల ఢిల్లీలో జరిగిన నిపుణుల కమిటీ సమావేశంలో, కమిటీ చైర్మన్, NDSA సభ్యుడు సమీర్ కుమార్ శుక్లా మేడిగడ్డ వద్ద తాత్కాలిక రబ్బర్ డ్యామ్ ప్రతిపాదనను వ్యతిరేకించారు. బ్యారేజీ పరీక్షల ఆధారంగానే డిజైన్లు ఇవ్వాలని, దానికి గడువు ఉండాలని ఆయన స్పష్టం చేశారు. ఈ నేపథ్యంలో, పునరుద్ధరణపై తదుపరి కమిటీ సమావేశంలో మరింత స్పష్టత వచ్చే అవకాశం ఉంది.