జూలైలో జీఎస్టీ వసూళ్లలో తెలంగాణకు 19% వృద్ధి, రూ.7,865 కోట్లు వసూలు

తెలంగాణ రాష్ట్ర వాణిజ్య పన్నుల శాఖ జూలై నెలలో రికార్డు స్థాయిలో ఆదాయం పొందింది. జీఎస్టీ, వ్యాట్, ప్రొఫెషనల్ ట్యాక్స్ కలిపి మొత్తం రూ.7,865 కోట్లు వసూలు చేసింది. గత ఏడాది జూలైతో పోలిస్తే ఇది 19% అధికం. అదనంగా రూ.1,241 కోట్లు వచ్చాయి.

దేశవ్యాప్తంగా జూలైలో జీఎస్టీ ఆదాయం 15.4% వృద్ధితో రూ.2.11 లక్షల కోట్లకు చేరింది. వృద్ధిలో హర్యానా అగ్రస్థానంలో ఉండగా, తెలంగాణ, గుజరాత్ రెండో స్థానంలో నిలిచాయి. ఒక్క జీఎస్టీ పరంగా చూస్తే తెలంగాణలో 22% వృద్ధి నమోదైంది. ఈ నెలలో జీఎస్టీ ద్వారానే రూ.4,452 కోట్లు వసూలయ్యాయి.

2017లో జీఎస్టీ అమలు ప్రారంభమైనప్పుడు తెలంగాణలో 1.83 లక్షల మంది పన్ను చెల్లింపుదారులు ఉండేవారు. ప్రస్తుతం ఈ సంఖ్య 5.25 లక్షలకు చేరింది. అక్రమ జీఎస్టీ నమోదులు, నకిలీ ఐటీసీ క్లెయిమ్‌లను అడ్డుకునేందుకు తీసుకున్న చర్యల వల్ల వసూళ్లు పెరిగాయని అధికారులు తెలిపారు.

రాష్ట్ర ఆదాయం పెంచేందుకు ముఖ్యమంత్రి, ఉప ముఖ్యమంత్రి ఆదేశాల మేరకు అక్రమాలపై కఠిన ఎన్ఫోర్స్మెంట్ చేపట్టామని వాణిజ్య పన్నుల శాఖ అధికారులు వెల్లడించారు. నకిలీ నోటీసుల ద్వారా వ్యాపారుల నుంచి సొమ్ము వసూళ్లకు పాల్పడే వారిపై కూడా చర్యలు తీసుకుంటున్నామని, దీంతో భవిష్యత్‌లో వసూళ్లు మరింత పెరిగే అవకాశం ఉందని అభిప్రాయపడ్డారు.