ఐఏఎస్ సందీప్ సుల్తానియాపై బెయిలబుల్ వారెంట్ జారీ చేసిన తెలంగాణ హైకోర్టు

తెలంగాణ హైకోర్టు ఐఏఎస్ అధికారి సందీప్ కుమార్ సుల్తానియాపై బెయిలబుల్ వారెంట్ జారీ చేసింది. కోర్టు ధిక్కరణ కేసులో ఆయనను అరెస్ట్ చేయాలని హైదరాబాద్ పోలీస్ కమిషనర్‌కు హైకోర్టు ఆదేశించింది.

సికింద్రాబాద్ కంటోన్మెంట్ బోర్డుకు చెల్లించాల్సిన నిధులు విడుదల చేయాలన్న కోర్టు ఉత్తర్వులను పాటించనందుకు ఈ చర్య తీసుకున్నారు. లాయర్ దారబోయిన సుబ్రహ్మణ్యం యాదవ్ దాఖలు చేసిన పిటిషన్‌పై విచారించిన ధర్మాసనం, తమ ఆదేశాలను అమలు చేయకపోవడంపై తీవ్ర అసంతృప్తి వ్యక్తం చేసింది. సందీప్ సుల్తానియా కౌంటర్ దాఖలు చేయలేదని కోర్టు పేర్కొంది.

ఈ నేపథ్యంలో సందీప్‌ను అదుపులోకి తీసుకొని ఈరోజు ఉదయం 10:30 గంటలకు కోర్టు ఎదుట హాజరుపరచాలని హైదరాబాద్ సీపీని కోర్టు ఆదేశించింది. అయితే, నిర్ణీత సమయానికి హాజరవుతానని అండర్టేకింగ్ ఇస్తూ రూ.5 వేల వ్యక్తిగత పూచీకత్తు ఇస్తే ఆయనను బెయిల్‌పై విడుదల చేయవచ్చని కోర్టు స్పష్టం చేసింది.

సందీప్ సుల్తానియాపై గతంలోనూ కోర్టు ధిక్కరణ కేసులు నమోదయ్యాయి. మిషన్ భగీరథ పనులకు సంబంధించి ఎన్సీసీ లిమిటెడ్‌కు చెల్లించాల్సిన బకాయిలు, ఉద్యోగుల ఓపీఎస్ వివాదం తదితర కేసుల్లోనూ ఆయనకు హెచ్చరికలు జారీ చేసినట్లు న్యాయవర్గాలు తెలిపాయి. ఆర్థిక శాఖ ముఖ్య కార్యదర్శిగా పనిచేస్తున్న ఈ అధికారిపై కోర్టు పలుమార్లు తీవ్ర అసహనం వ్యక్తం చేసిందని తెలుస్తోంది.

ఈ కేసులో సందీప్ సుల్తానియా కోర్టుకు హాజరవుతారా లేదా అన్నది ఆసక్తికరంగా మారింది. బెయిలబుల్ వారెంట్ జారీ చేసిన నేపథ్యంలో ఆయన న్యాయపరమైన చర్యలు ఎలా ఉంటాయో చూడాలి.