తెలంగాణలో వచ్చే నాలుగైదు రోజులు తీవ్ర వేడిమి — IMD హెచ్చరిక

తెలంగాణలో వచ్చే నాలుగైదు రోజులు ఉష్ణోగ్రతలు మరింత పెరిగే అవకాశం ఉందని IMD సీనియర్ అధికారి ధర్మరాజు తెలిపారు. ఉత్తర, దక్షిణ తెలంగాణ జిల్లాలకు orange అలర్ట్ జారీ చేశారు.

ఉష్ణోగ్రతలు సాధారణం కంటే 2 నుంచి 4 డిగ్రీలు అధికంగా నమోదయ్యే అవకాశం ఉందని అధికారులు తెలిపారు. నిన్న అదిలాబాద్‌లో 43°C, నిజామాబాద్ మరియు మెదక్‌లో 42°C, మహబూబ్‌నగర్‌లో 41°C నమోదైంది. హైదరాబాద్ నగరంలో 40°C వరకు చేరింది. హైత్‌నగర్, పఠాన్‌చెరువు, రాజేంద్రనగర్ శివారు ప్రాంతాల్లో కూడా 40°C నమోదైంది.

రాత్రిపూట కనిష్ట ఉష్ణోగ్రతలు కూడా 30°C వరకు ఉంటున్నాయని అధికారి తెలిపారు. ఉమ్మడి ఆదిలాబాద్, ఉమ్మడి మహబూబ్‌నగర్ జిల్లాల్లో ఎండ తీవ్రత గరిష్టంగా ఉంటుందని అంచనా. రానున్న రోజుల్లో ఉష్ణోగ్రతలు 41 నుంచి 44°C వరకు చేరవచ్చని IMD అంచనా వేసింది.

బంగాళాఖాతంలో అల్పపీడనం కొనసాగుతున్న నేపథ్యంలో భద్రాద్రి కొత్తగూడెం, ఖమ్మం, నల్గొండ, నాగర్‌కర్నూల్, జోగులాంబ గద్వాల్, మహబూబాబాద్ జిల్లాల్లో తేలికపాటి వర్షాలు పడే అవకాశం ఉందన్నారు. గాలి వేగం గంటకు 30–40 కి.మీ. ఉంటుందని అంచనా. నిన్న కరీంనగర్‌లో 45 కి.మీ., వనపర్తిలో 43 కి.మీ. గాలి వేగం నమోదైంది.

తేలికపాటి వర్షం వచ్చినా వేగంగా వీచే గాలుల వల్ల నష్టం జరిగే అవకాశం ఉందని ధర్మరాజు హెచ్చరించారు.