తెలంగాణకు వారం పాటు వర్ష సూచన, మూడు జిల్లాలకు హెవీ రెయిన్ అలర్ట్

తెలంగాణలో రానున్న ఏడు రోజుల పాటు మోస్తరు నుంచి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం సీనియర్ అధికారి రఘు తెలిపారు. మంగళవారం ఆయన వాతావరణ వివరాలు వెల్లడించారు. ఈ రోజు ములుగు, భద్రాద్రి కొత్తగూడెం, ఖమ్మం జిల్లాలకు భారీ వర్ష సూచన చేశారు. మిగతా జిల్లాల్లో తేలికపాటి నుంచి మోస్తరు వర్షాలు పడతాయన్నారు.

గత వారం కురిసిన విస్తారమైన వర్షాల వల్ల గాలిలో తేమ శాతం ఎక్కువగా ఉంది. పగటి ఉష్ణోగ్రత పెరిగినప్పుడు ఆ తేమ మేఘాలుగా మారి సాయంత్రం వర్షం కురుస్తోంది. స్థానిక కన్వర్జెన్స్ జోన్ ప్రభావంతో మంగళవారం నిజామాబాద్, రాజన్న సిరిసిల్ల జిల్లాల్లో భారీ వర్షం నమోదైంది.

ప్రస్తుతం రాష్ట్రంలో వర్షపాతం సాధారణ స్థాయికి దగ్గరగా ఉంది. జూన్ 1 నుంచి ఇప్పటివరకు -8 శాతం లోటు మాత్రమే నమోదైంది. ఇది సాధారణ పరిధి (-19% నుంచి +19%) లోనే ఉందని రఘు వివరించారు. ఈ నెల 13 తర్వాత తెలంగాణలో ఉపరితల ఆవర్తనాలు లేదా ద్రోణి ప్రభావంతో మళ్లీ వర్షాలు విస్తరించే అవకాశం ఉందని చెప్పారు.

హైదరాబాద్ నగరంలో రానున్న రెండు, మూడు రోజుల్లో తేలికపాటి నుంచి మోస్తరు వర్షాలు కురుస్తాయి. ఉష్ణోగ్రతలు సాధారణ స్థాయిలోనే ఉంటాయని వాతావరణ కేంద్రం పేర్కొంది. గ్రేటర్ హైదరాబాద్ పరిధిలో ఈదురు గాలులతో కూడిన జల్లులు పడే సూచన ఉంది.