తెలంగాణలో మరో మూడు రోజులు భారీ వర్షాలు: వాతావరణ శాఖ హెచ్చరిక

తెలంగాణలో రాబోయే మూడు రోజులు ఉరుములు, మెరుపులతో కూడిన భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. గంటకు 50 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది.

విదర్భ, మధ్యప్రదేశ్ ప్రాంతంపై ఉన్న వాయుగుండం వాయువ్య దిశగా కదులుతోంది. ఇది వచ్చే 24 గంటల్లో అల్పపీడనంగా బలహీనపడుతుందని, నైరుతి గాలులతో వర్షాలకు అనుకూల పరిస్థితులు ఏర్పడాయని హైదరాబాద్ వాతావరణ కేంద్రం వెల్లడించింది.

గత రెండు రోజుల్లో రాష్ట్రంలో 96 మండలాల్లో భారీ నుంచి అతి భారీ వర్షపాతం నమోదైంది. జగిత్యాల జిల్లా బీర్పూర్ మండలంలో 14 సెంటీమీటర్ల వర్షం పడింది. ఆదిలాబాద్, జగిత్యాల, కొమరంభీం ఆసిఫాబాద్ జిల్లాల్లో అత్యధిక వర్షం కురిసింది. మంచిర్యాల, నిజామాబాద్, పెద్దపల్లి, కరీంనగర్, కామారెడ్డి, జయశంకర్ భూపాలపల్లి, నిర్మల్, వరంగల్ జిల్లాల్లో సాధారణం కంటే ఎక్కువ వర్షపాతం నమోదైంది.

ఈ వర్షాలతో రాష్ట్రంలో వర్షపాత లోటు 33 శాతం నుంచి 5 శాతానికి తగ్గింది. గోదావరి నది ఉధృతంగా ప్రవహిస్తోంది. కాళేశ్వరం వద్ద 13 మీటర్ల ఎత్తులో నీరు ప్రవహిస్తుండడంతో మొదటి ప్రమాద హెచ్చరిక జారీ చేశారు. భద్రాచలం వద్ద రెండో ప్రమాద హెచ్చరిక స్థాయికి నీరు చేరువైంది. ప్రాణహిత, ఇంద్రావతి నదుల నుంచి లక్షలాది క్యూసెక్కుల నీరు గోదావరిలోకి వస్తోంది. కడెం, ఎల్లంపల్లి ప్రాజెక్టుల నుంచి నీటిని దిగువకు విడుదల చేస్తున్నారు.

వరద ముంపు ముప్పు దృష్ట్యా ప్రజలు అత్యవసరమైతే తప్ప బయటకు రావద్దని, వాగులు, వంకలు, గోదావరి నదీ పరివాహక ప్రాంతాలకు వెళ్లొద్దని అధికారులు హెచ్చరించారు. ఉత్తర తెలంగాణ జిల్లాలపై వాతావరణ శాఖ ప్రత్యేక దృష్టి పెట్టింది. దక్షిణ తెలంగాణలోని కొన్ని జిల్లాల్లో మాత్రం ఇప్పటికీ భారీ వర్షాలు నమోదు కాలేదు.