తెలంగాణలో భారీ వర్ష హెచ్చరిక: ఉత్తర, తూర్పు, మధ్య జిల్లాలకు ఆరెంజ్ అలర్ట్

వాతావరణ శాఖ తెలంగాణలో భారీ వర్షాల హెచ్చరిక జారీ చేసింది. నేడు (శనివారం) ఉత్తర, తూర్పు, మధ్య తెలంగాణ జిల్లాలలో భారీ నుంచి అతి భారీ వర్షం కురిసే అవకాశం ఉందని తెలిపింది. కొన్ని జిల్లాలకు ఆరెంజ్ అలర్ట్ జారీ చేశారు.

ఆదిలాబాద్, కొమరంభీం ఆసిఫాబాద్, మంచిర్యాల, జగిత్యాల, పెద్దపల్లి, భూపాలపల్లి, ములుగు, భద్రాద్రి కొత్తగూడెం జిల్లాలకు ఆరెంజ్ అలర్ట్ ప్రకటించారు. ఈ ప్రాంతాల్లో మధ్యాహ్నం నుంచి రాత్రి వరకు ఉరుములు, మెరుపులతో కూడిన వర్షాలు కురుస్తాయని హెచ్చరించారు.

నిన్న (శుక్రవారం) సూర్యాపేట, భువనగిరి, యాదాద్రి, రంగారెడ్డి, సంగారెడ్డి, వికారాబాద్ జిల్లాల్లో ఎరుపు హెచ్చరికల మధ్య భారీ వర్షపాతం నమోదైంది. అకాల వర్షాలు పలు ప్రాంతాల్లో ఇబ్బందికి కారణమయ్యాయి.

హైదరాబాద్‌లో మధ్యాహ్నం నుంచి రాత్రి వరకు కొన్ని ప్రాంతాల్లో వర్షం పడే అవకాశం ఉంది. మరికొన్ని ప్రాంతాలు పొడిగా ఉండనున్నాయని వాతావరణ శాఖ తెలిపింది.

గంటకు 40 నుంచి 50 కిలోమీటర్ల వేగంతో ఈదురుగాలులు వీచొచ్చని, పిడుగులు పడే అవకాశం ఉందని హెచ్చరించారు. ప్రజలు లోతట్టు ప్రాంతాలు, చెట్ల కింద, విద్యుత్ తీగల కింద ఉండవద్దని సూచించారు. రాబోయే మూడు రోజుల్లో రాష్ట్రవ్యాప్తంగా భారీ వర్షాలు కొనసాగే అవకాశం ఉందని వాతావరణ నిపుణులు తెలిపారు.