ములుగు, భద్రాద్రి, ఖమ్మం జిల్లాల్లో భారీ వర్ష సూచన; రాష్ట్రవ్యాప్తంగా ఉరుములతో వర్షాలు

తెలంగాణలో ఈ రోజు ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది. ములుగు, భద్రాద్రి కొత్తగూడెం, ఖమ్మం జిల్లాల్లో ఒకటి రెండు చోట్ల భారీ వర్షాలు కురిసే అవకాశం ఉన్నందున వీటికి ఎల్లో హెచ్చరిక జారీ చేసినట్లు వాతావరణ శాఖ అధికారి రాఘవేంద్ర రాజు చెప్పారు.

హైదరాబాద్ నగరంలోనూ తేలికపాటి నుంచి మోస్తరు వర్షాలు కురిసే అవకాశం ఉంది. రాష్ట్రవ్యాప్తంగా పలు చోట్ల ఉరుములు, మెరుపులతో కూడిన వర్షాలు కురుస్తాయని ఆయన వివరించారు.

ఈ వర్షాలకు కారణం రాయలసీమ, తెలంగాణ, ఉత్తర తమిళనాడు వైపు ఏర్పడిన కన్వర్జెన్స్ జోన్ అని అధికారి తెలిపారు. నిన్న నిజామాబాద్ జిల్లాలో అత్యధికంగా 7 సెంటీమీటర్ల వర్షపాతం నమోదైంది. ప్రస్తుతం రాష్ట్రవ్యాప్తంగా సగటు వర్షపాతంలో 8 శాతం లోటు ఉండగా, యాదాద్రి భువనగిరి జిల్లాలో 47 శాతం లోటుతో అత్యధికంగా నమోదైంది.

ఉత్తర భారతదేశంలోని అల్పపీడనం రాష్ట్రంపై ప్రభావం చూపదని, 13వ తేదీ వరకు సమీపంలో కొత్త అల్పపీడనాలు ఏర్పడే అవకాశాలు కనిపించడం లేదని తెలిపారు. 13 తర్వాత ఒడిశా తీరంలో ఒక అల్పపీడనం ఏర్పడే సూచనలు ఉన్నాయని, అయితే ఇంకా ఖచ్చితమైన అంచనా రాలేదని రాఘవేంద్ర రాజు చెప్పారు. నైరుతి రుతుపవనాలు ప్రస్తుతం బలహీనంగా ఉన్నాయని ఆయన వెల్లడించారు.