ఉచిత పథకాలపై హైకోర్టు కీలక వ్యాఖ్యలు: అధికారులపై భారం, ఆర్థిక ఒత్తిడి

హైదరాబాద్‌లోని తెలంగాణ హైకోర్టు గురువారం ఒక ధిక్కార కేసు విచారణ సందర్భంగా ఉచిత పథకాలపై కీలక వ్యాఖ్యలు చేసింది. కంటోన్మెంట్ బోర్డుకు నిధులు విడుదల చేయాలని రెండేళ్ల క్రితం ఇచ్చిన ఆదేశాలు అమలు కాలేదని దాఖలైన కేసులో, ప్రత్యేక ప్రధాన కార్యదర్శి సందీప్‌కుమార్ సుల్తానియా వ్యక్తిగతంగా న్యాయస్థానం ముందు హాజరయ్యారు.

ఈ సందర్భంగా న్యాయమూర్తి జస్టిస్ నాగేష్ భీమపాక మాట్లాడుతూ, ప్రభుత్వం అమలు చేస్తున్న జనాకర్షక పథకాలు ఆచరణ సాధ్యంగా లేవని అభిప్రాయపడ్డారు. ఉచిత పథకాల వల్ల రాష్ట్ర ఆర్థిక వ్యవస్థపై ఒత్తిడి పెరిగిందని, ఫలితంగా ప్రభుత్వ ఆస్తులను అమ్మాల్సిన పరిస్థితి వస్తోందని ఆయన అన్నారు.

ఇదే పరిస్థితి కొనసాగితే ఏ అధికారీ విధులు నిర్వర్తించలేని స్థితి వస్తుందని న్యాయమూర్తి హెచ్చరించారు. ఒక్కో అధికారిపై 3 నుంచి 4 వేల కేసులు ఉన్నాయని, ఇలా అయితే వారిని జీవితాంతం జైల్లోనే ఉంచాల్సి వస్తుందని గుర్తు చేశారు. భవిష్యత్తులో ఎవరు ముఖ్యమంత్రి అయినా ఇవే సమస్యలు ఎదుర్కోవాల్సి వస్తుందని అన్నారు.

'ఇలాగే ఉంటే కుబేరుడు కూడా కూలి పనులోకి వెళ్లాల్సి వస్తుంది' అని న్యాయమూర్తి వ్యాఖ్యానించారు. అనర్హులైన లబ్ధిదారుల జాబితాల నుంచి ఒక్క తెల్లకాడు కూడా తొలగించలేరా అని ప్రశ్నించారు. ప్రభుత్వం ఇష్టారాజ్యంగా పథకాలు అమలు చేయడంతో ఆర్థిక క్రమశిక్షణ దెబ్బతిందని, దీనికి అధికారులు జవాబు చెప్పలేని పరిస్థితి నెలకొందని న్యాయమూర్తి పేర్కొన్నారు.