తెలంగాణలో డయల్ 112 సేవ ప్రారంభం: పోలీస్, ఫైర్, వైద్యం సహా అన్ని అత్యవసర సేవలు ఒకే నంబర్‌కు

హైదరాబాద్‌లో డీజీపీ సీవీ ఆనంద్ డయల్ 112 సేవను ప్రారంభించారు. పోలీస్, అగ్నిమాపక, వైద్య, మహిళా రక్షణ, చైల్డ్ వెల్ఫేర్, హైడ్రా, జీహెచ్ఎంసీ వంటి అన్ని అత్యవసర సేవలను ఒకే నంబర్‌కు ఫోన్ చేయడం ద్వారా పొందవచ్చని ఆయన తెలిపారు.

డయల్ 112 కు వచ్చే కాల్స్‌ను ఎట్టి పరిస్థితుల్లోనూ తిరస్కరించరని డీజీపీ స్పష్టం చేశారు. కాలర్ లొకేషన్‌ను గుర్తించడానికి అధునాతన సాంకేతిక పరికరాలను వినియోగిస్తున్నామని వివరించారు. డయల్ 112 3.0 వెర్షన్‌తో సేవలు అందిస్తుందని చెప్పారు.

త్వరలోనే డ్రోన్ ఆధారిత డిస్పాచ్ వ్యవస్థను ప్రవేశపెట్టనున్నట్లు డీజీపీ ప్రకటించారు. దేశంలోనే తొలిసారిగా ఈ తరహా వ్యవస్థను తెలంగాణ పోలీసులు అమలు చేయబోతున్నట్లు తెలిపారు. ఇప్పటికే కమలహాసన్ రెడ్డి బృందం ఐదు డ్రోన్లను సేకరించి ప్రదర్శన ఇచ్చిందని చెప్పారు.

డ్రోన్ బేస్డ్ డిస్పాచ్, డ్రోన్ బేస్డ్ ట్రాఫిక్ మేనేజ్‌మెంట్, డ్రోన్ బేస్డ్ క్రౌడ్ మేనేజ్‌మెంట్ వ్యవస్థలను తెలంగాణ పోలీస్ బృందం తీసుకువస్తోందని డీజీపీ వివరించారు. న్యాయ సాయం, వైద్య సాయం, సైబర్ సాయం తదితర సమస్యలకు 112 ద్వారా పరిష్కారం లభిస్తుందన్నారు.

బేసిక్ పోలీసింగ్‌తో పాటు టెక్నాలజీ పోలీసింగ్‌ను తీసుకువస్తున్నామని డీజీపీ చెప్పారు. ఈ చర్య వలన అత్యవసర సమయంలో ప్రజలకు వేగంగా సహాయం అందుతుందని అధికారులు భావిస్తున్నారు.