పౌర సేవల ధృవీకరణ కోసం తెలంగాణ ఫ్యామిలీ రిజిస్టర్ ప్రారంభం

ప్రభుత్వ పథకాలు, సేవలను పొందేందుకు కుటుంబ వివరాల ధృవీకరణలో ప్రజలు ఎదుర్కొంటున్న ఇబ్బందులను తగ్గించేందుకు తెలంగాణ ప్రభుత్వం కొత్త డిజిటల్ రిజిస్టర్ అందుబాటులోకి తెచ్చింది.

'తెలంగాణ ఫ్యామిలీ రిజిస్టర్' పేరుతో రాష్ట్ర స్థాయి ఎలక్ట్రానిక్ రికార్డును రెవెన్యూ శాఖ ఏర్పాటు చేసింది. ప్రతి కుటుంబానికి ఉన్న రేషన్ కార్డు నెంబరే ఈ రిజిస్టర్లో ఫ్యామిలీ ఐడీగా ఉపయోగపడుతుంది. సివిల్ సప్లయిస్ కమిషనర్ నిర్వహించే ఫుడ్ సెక్యూరిటీ కార్డ్ డేటాబేస్ నుంచి స్వయంచాలకంగా వివరాలు తీసుకొని ఈ రిజిస్టర్లో పొందుపరుస్తారు.

ఇందులో కుటుంబ యజమాని పేరు, కుటుంబ సభ్యుల పేర్లు, వారి సంబంధం, వయసు, పుట్టిన తేదీ, జెండర్, ఆధార్ నెంబర్, ప్రస్తుత చిరునామా వంటి వివరాలు రికార్డు అవుతాయి.

పౌరులు మీసేవ కేంద్రం, మీసేవ ఆన్‌లైన్ పోర్టల్ లేదా మొబైల్ యాప్ ద్వారా నిర్ణీత రుసుం చెల్లించి ఫ్యామిలీ రిజిస్టర్ సర్టిఫికెట్ కోసం దరఖాస్తు చేసుకోవచ్చు. కుటుంబంలో వయసు నిండిన ఎవరైనా ఒక సభ్యుడు దరఖాస్తు చేయవచ్చు. దరఖాస్తు ఆటోమేటిక్‌గా సంబంధిత మండల తహసీల్దార్ లాగిన్‌కు చేరుతుంది. తహసీల్దార్ పౌర సరఫరాల శాఖ రికార్డును సరిచూసి, వివరాలు సరిగ్గా ఉంటే డిజిటల్ సంతకంతో సర్టిఫికెట్‌ను ఆమోదిస్తారు. దరఖాస్తు చేసుకున్న రెండు పనిదినాల్లోనే సర్టిఫికెట్ డౌన్‌లోడ్ చేసుకునే సదుపాయం కల్పించాలని ప్రభుత్వం తహసీల్దార్లను ఆదేశించింది.

ఈ సర్టిఫికెట్ కేవలం సివిల్ సప్లయిస్ డేటాబేస్ లోని కుటుంబ సభ్యుల రికార్డు మాత్రమేనని, ఆస్తి హక్కులు, వారసత్వ హక్కులు దీని వల్ల సంక్రమించవని ప్రభుత్వం స్పష్టం చేసింది. ప్రభుత్వ పథకాలు, పౌర సేవలను సులభంగా పొందేందుకు మాత్రమే ఇది ఉపయోగపడుతుంది. జిల్లా కలెక్టర్లు తమ పరిధిలో ఈ సేవల నిర్వహణను ఎప్పటికప్పుడు పర్యవేక్షించాలని ఆదేశించారు.