తెలంగాణలో 5 రోజుల్లో తేలికపాటి వర్షాలు: వ్యవసాయ, పశు సంరక్షణ సూచనలు

హైదరాబాద్ వాతావరణ కేంద్రం సమాచారం ప్రకారం, రాబోయే ఐదు రోజుల్లో తెలంగాణలో అక్కడక్కడ తేలికపాటి నుండి ఓ మోస్తారు వర్షాలు కురిసే అవకాశం ఉంది. ఈ కాలంలో పగటి ఉష్ణోగ్రతలు 29 నుండి 37 డిగ్రీలు, రాత్రి ఉష్ణోగ్రతలు 23 నుండి 28 డిగ్రీల సెల్సియస్ ఉండవచ్చు.

ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం (PJTSAU) ఈ వాతావరణ పరిస్థితులకు అనుగుణంగా రైతులకు కొన్ని కీలక సూచనలు చేసింది. ఆగస్టు 1 నుండి 15 వరకు కంది, ఉలవలు, అలసందలు, ఆముదం, పొద్దుతిరుగుడుతో పాటు తక్కువ కాలపరిమితి కూరగాయలు విత్తుకోవచ్చు. ఆగస్టు 16 నుండి 31 లోపు నువ్వుల విత్తనాలు వేయాలి. ఎరువులను భూమి ఉపరితలంపై చల్లకుండా, మొక్కల వేర్ల సమీపంలో వేసి మట్టితో కప్పాలి. పట్టణ శివారు ప్రాంతాల్లో పరిమిత నీటి వనరులతో కూరగాయలు సాగుచేసే రైతులు, బోదెలు లేదా ఎత్తుమడులు పద్ధతిలో తక్కువ నీటి అవసరమున్న ఆరుతడి పంటలను ఎంచుకోవాలి.

వరి నారుమడి సిద్ధం చేసే వారం ముందు, ఎకరాకు సరిపడా నారుమడికి 800 గ్రాముల కార్బోఫ్యూరాన్ 3సిజి గుళికలను ఇసుకతో కలిపి వేయాలి. కాండం తొలుచు పురుగు ఆశించే ప్రాంతాల్లో, నాటిన 15 రోజులకు ఎకరాకు 10 కిలోల కార్బోఫ్యూరాన్ 3సిజి వాడాలి. ప్రతి రెండు మీటర్లకు కాలిబాట ఏర్పాటు చేస్తే గాలి వెలుతురు ప్రసరించడంతో పాటు సుడిదోమ నివారణకు ఉపయోగపడుతుంది.

ప్రస్తుతం కురిసిన వర్షాలను ఉపయోగించుకుని వర్షాధార పత్తిలో రసం పీల్చే పురుగుల నివారణకు ఎకరాకు 10 చొప్పున పసుపు, తెలుపు, నీలం జిగురు అట్టలు అమర్చాలి. 30, 45 రోజుల పంట దశలో ఇమిడాక్లోప్రిడ్ లేదా ఫ్లోరికామిడ్ మందును నీటిలో కలిపి కాండానికి పూయాలి. మొక్కజొన్నలో కత్తెర పురుగు కనిపిస్తే, క్లోరాట్రినిలిప్రోల్ 0.4 మి.లీ. లేదా స్పైనటోరం 0.5 మి.లీ. ని లీటరు నీటికి కలిపి ఆకు సుడుల లోపల పిచికారి చేయాలి. లేదా 1 కిలో సున్నం, 9 కిలోల ఇసుక కలిపి సుడులలో వేయాలి. మొదటి దఫా నత్రజని ఎరువుగా 30 రోజుల దశలో ఎకరాకు 25 కిలోల యూరియా వేయాలి.

పశు సంపద విషయంలో, వాతావరణం కోళ్ళలో కొక్కెర తెగులు, గొర్రెల్లో పిపిఆర్, ఆవులు-గేదెల్లో గొంతువాపు వ్యాధులకు అనుకూలంగా ఉన్నందున టీకాలు వేయించాలి. గొర్రెల్లో నట్టల నివారణకు డీవార్మింగ్ చేయాలి.