తెలంగాణలో మద్యం ధరలు పెరిగే అవకాశం – ప్రభుత్వ నిర్ణయం వారంలోపే

తెలంగాణ ప్రభుత్వం మద్యం ధరలు పెంచే యోచనలో ఉంది. ధరల నిర్ణయ కమిటీ (ప్రైస్ ఫిక్సేషన్ కమిటీ) ప్రభుత్వానికి నివేదిక సమర్పించింది. ఈ నివేదికలో మద్యం గరిష్ట చిల్లర్ ధరలను (MRP) పెంచాలని సిఫారసు చేసినట్లు సమాచారం.

ప్రముఖ బ్రాండ్ల ధరలను 10 నుంచి 15 శాతం పెంచే అవకాశం ఉన్నప్పటికీ, ఎంత శాతం పెంచాలనేది ఇంకా స్పష్టంగా తెలియలేదు. ఉత్పత్తి వ్యయాలు, పన్నుల భారం, రవాణా ఖర్చులు పెరగడంతో మద్యం తయారీ సంస్థలు ధరల పెంపు కోసం చాలాకాలంగా కోరుతున్నాయి. 2025లో ప్రభుత్వం ప్రత్యేక కమిటీ ఏర్పాటు చేసింది.

గత 2023లో చివరిసారిగా ధరలు పెరిగాయి. అప్పుడు తక్కువ ధర బ్రాండ్లపై 15%, మధ్యస్థాయి బ్రాండ్లపై 12%, సెమీ ప్రీమియం, ప్రీమియం బ్రాండ్లపై 6 నుంచి 10% వరకు పెరిగాయి. ఈసారి ప్రీమియం, సెమీ ప్రీమియం, ఇతర బ్రాండ్లను మూడు విభాగాలుగా విభజించి వివిధ శాతాల్లో ధరలు పెంచే అవకాశం ఉంది.

ఎక్సైజ్ శాఖ రాష్ట్రానికి ప్రధాన ఆదాయ వనరు. రాష్ట్ర ఆదాయాన్ని పెంచుకునేందుకు, బడ్జెట్ లోటును పూడ్చేందుకు ప్రభుత్వం ఈ నిర్ణయం తీసుకునే అవకాశం ఉంది. వచ్చే వారంలోపు ప్రభుత్వం తుది నిర్ణయం ప్రకటించవచ్చని సమాచారం.