ఆటో, క్యాబ్ సమ్మె విరమించాలని మంత్రి పొన్నం విజ్ఞప్తి

హైదరాబాద్‌లో కొనసాగుతున్న ఆటో, క్యాబ్ డ్రైవర్ల సమ్మెపై తెలంగాణ రవాణా శాఖ మంత్రి పొన్నం ప్రభాకర్ స్పందించారు. ఆటో కార్మికుల సమస్యలను పరిష్కరిస్తామని ఆయన హామీ ఇచ్చారు. సమ్మె నిర్ణయాన్ని వెనక్కి తీసుకోవాలని కోరారు.

ఆటో చార్జీల పెంపుపై ప్రత్యేక కమిటీ ఏర్పాటు చేస్తామని మంత్రి ప్రకటించారు. 2012 నుంచి మీటర్ చార్జీలు పెంచలేదని ఆయన గుర్తు చేశారు. కమిటీలో రవాణా శాఖ, రెవెన్యూ శాఖ అధికారులు ఉంటారని తెలిపారు.

డీజిల్ ధరలు, వాహనాల ధరలు పెరిగిన అంశాలను కమిటీ పరిశీలిస్తుందని చెప్పారు. కమిటీ నివేదిక అనుగుణంగా ఛార్జీల పెంపుపై నిర్ణయాన్ని సమిష్టిగా తీసుకుంటామని వివరించారు. ఆటో కార్మికులు న్యాయమైన కోరికలే కోరుతున్నారని ఆయన అన్నారు. సమ్మె విరమణపై ఆటో కార్మికుల నిర్ణయం తెలియాల్సి ఉంది.