తెలంగాణలో నిరుపేదల కోసం కొత్త పింఛన్ పథకం: నెలకు రూ. 2,016, నిబంధనలు ఇవే

తెలంగాణ ప్రభుత్వం ఆర్థికంగా వెనుకబడిన వర్గాల కోసం కొత్త పింఛన్ పథకాన్ని ప్రారంభించింది. ఈ పథకం కింద ఆగస్టు నెల నుంచి అర్హులైన వారికి నెలకు రూ. 2016 చెల్లించనుంది. ఒంటరి మహిళలు, వితంతువులు, బీడీ కార్మికులు, నేత కార్మికులు, డయాలసిస్ రోగులు, దివ్యాంగులు ఈ పథకానికి అర్హులు.

దరఖాస్తు ప్రక్రియ ప్రారంభమైంది. ప్రభుత్వ వెబ్‌సైట్ నుంచి ఫారం డౌన్‌లోడ్ చేసుకుని, వివరాలు నింపి గ్రామ కార్యదర్శి లేదా మండల కార్యాలయంలో అప్పగించాలి. వాటిని పరిశీలించిన తర్వాత మంజూరు చేస్తారు.

పింఛన్ అర్హత నిర్ణయానికి కట్టుదిట్టమైన నిబంధనలు విధించారు. గ్రామీణ ప్రాంతాల్లో కుటుంబ వార్షిక ఆదాయం రూ. 1.5 లక్షలకు, పట్టణాల్లో రూ. 1 లక్షకు మించకూడదు. భూమి కలిగి ఉంటే మాగాణి 3 ఎకరాల లోపు, మెట్టాణి 7.5 ఎకరాల లోపు ఉండాలి. కార్లు, ట్రాక్టర్లు, డీసీఎం వంటి నాలుగు చక్రాల వాహనాలు కలిగి ఉండకూడదు. ప్రస్తుతం ఇతర పింఛన్లు పొందుతున్నవారు, ప్రభుత్వ ఉద్యోగులు, ఔట్‌సోర్సింగ్, కాంట్రాక్టు సిబ్బంది, రైస్ మిల్లులు, పెట్రోల్ బంకుల యజమానులు ఈ పథకానికి అనర్హులు.

ఇప్పటికే దరఖాస్తు చేసుకున్న వారు మళ్లీ దరఖాస్తు చేయాల్సిన అవసరం లేదు. అయితే తమ పేరు జాబితాలో ఉందో లేదో గ్రామ కార్యదర్శిని అడిగి నిర్ధారించుకోవాలి.

అదే సమయంలో, మహాలక్ష్మి పథకం కింద మరో 5 లక్షల కుటుంబాలకు రూ. 500కే గ్యాస్ సిలిండర్ ఇవ్వనున్నట్లు ప్రభుత్వం తెలిపింది. ఇప్పటికే 42 లక్షల మంది లబ్ధిదారులు ఈ ప్రయోజనం పొందుతున్నారు.