ఆగస్టు 15 నుంచి తెలంగాణలో కొత్త పెన్షన్లు: 2.5 లక్షల మందికి లబ్ధి

తెలంగాణ ప్రభుత్వం స్వాతంత్ర్య దినోత్సవం సందర్భంగా ఆగస్టు 15 న కొత్త పెన్షన్లు పంపిణీ చేయనుంది. ఈ తొలి దశలో 2.5 లక్షల మందికి పెన్షన్లు మంజూరు చేయనున్నారు.

హైదరాబాద్లో ముఖ్యమంత్రి రేవంత్ రెడ్డి ఈ కార్యక్రమాన్ని అధికారికంగా ప్రారంభిస్తారు. జిల్లాల్లో ఇన్చార్జ్ మంత్రులు లబ్ధిదారులకు పెన్షన్ ప్రొసీడింగ్స్ అందజేస్తారు.

ఈసారి వితంతువులు, ఒంటరి మహిళలు, నేత, గీత కార్మికులతో పాటు తలసేమియా, సికిల్ సెల్ ఎనీమియా బాధితులకు కూడా పెన్షన్లు మంజూరు చేయనున్నారు. ప్రభుత్వం మార్గదర్శకాలు రూపొందించింది; ఒకట్రెండు రోజుల్లో ఉత్తర్వులు జారీ అవుతాయి.

రాష్ట్రంలో గతంలో 42 లక్షల పెన్షన్లు ఉండగా, అనర్హులను తొలగించడంతో ఆ సంఖ్య 39 లక్షలకు తగ్గింది. తాజాగా 2.5 లక్షల మందికి లబ్ధి కలగనుండటంతో మొత్తం 41.5 లక్షలకు చేరనుంది. ప్రస్తుత ప్రభుత్వం ఏర్పడిన నాటి నుంచి 23,625 మందికి కొత్తగా వృద్ధాప్య, వితంతు, హెచ్ఐవి/ఏఆర్టీ, డయాలసిస్ తదితర పెన్షన్లు మంజూరు చేశారు.

పెన్షన్ల లైవ్నెస్ ఆథెంటికేషన్ (ఈ-కేవైసీ) సర్వేకు ఈ నెల 15న తుది గడువు విధించారు. గ్రామీణ ప్రాంతాల్లో 19.42 లక్షల మందిలో 15.74 లక్షల మంది ధృవీకరణ పూర్తయింది; 13 జిల్లాల్లో 100% లక్ష్యం సాధించారు.

గ్రేటర్ హైదరాబాద్ పరిధిలోని హైదరాబాద్, రంగారెడ్డి, మేడ్చల్-మల్కాజ్‌గిరి జిల్లాల్లో మాత్రం వెరిఫికేషన్ ఆలస్యంగా సాగుతోంది. రాష్ట్రవ్యాప్తంగా పెండింగ్‌లో ఉన్న 1.61 లక్షల పెన్షన్లలో 1.33 లక్షలు ఈ మూడు జిల్లాల్లోనే ఉన్నాయి. హైదరాబాద్ జిల్లాలో 2.53 లక్షల లబ్ధిదారుల్లో 1.65 లక్షల మంది మాత్రమే ఈ-కేవైసీ పూర్తి చేసుకున్నారు; 78,313 మంది మిగిలారు. నివాసాలు మార్చడం, అద్దె ఇళ్లలో ఉండటం, సిబ్బంది కొరత కారణంగా ప్రక్రియ ఆలస్యం అవుతోందని, ఉన్నతాధికారులు అసహనం వ్యక్తం చేస్తున్నారు.