సైబర్ నేర నియంత్రణలో తెలంగాణ నంబర్‌వన్: సీఎం రేవంత్ రెడ్డి

సైబర్ నేర నియంత్రణ పనితీరులో దేశంలోని అన్ని రాష్ట్రాలలో తెలంగాణ ప్రథమ స్థానం సాధించిందని ముఖ్యమంత్రి రేవంత్ రెడ్డి వెల్లడించారు. ఈ విషయాన్ని తెలియజేస్తూ సోషల్ మీడియా వేదిక ఎక్స్ (ట్విట్టర్) లో ఆయన పోస్ట్ చేశారు.

సైబర్ నేరాల నివారణ, దర్యాప్తు, ఫిర్యాదుల పరిష్కారం, సామర్థ్య పెంపు, ప్రజా అవగాహన సహా తొమ్మిది కీలక పనితీరు సూచికలలో తెలంగాణ అత్యుత్తమ ప్రదర్శన కనబరిచిందని సీఎం రేవంత్ రెడ్డి పేర్కొన్నారు. ఈ సందర్భంగా తెలంగాణ పోలీసులు, సైబర్ సెక్యూరిటీ బ్యూరో అధికారులను ఆయన అభినందించారు.

ఆన్లైన్ భద్రత కోసం ప్రత్యేక హెల్ప్ లైన్ ఏర్పాటు, అవగాహన వీడియోల ద్వారా పౌరులకు సాధికారిత కల్పించే కార్యక్రమాలను కూడా సీఎం ప్రశంసించారు. సాంకేతిక ఆధారిత పోలీసింగ్, డిజిటల్ భద్రతపై రాష్ట్ర ప్రభుత్వం నిబద్ధతతో ఉందని, ఈ ర్యాంక్ ఆ నిబద్ధతకు ప్రతిబింబమని ఆయన పేర్కొన్నారు.