పరిషత్ ఎన్నికలకు మరింత ఆలస్యం; ఓటర్ల జాబితా సవరణే ప్రధాన కారణం

తెలంగాణలో ZPTC, MPTC ఎన్నికలపై మరో అనిశ్చితి నెలకొంది. ప్రస్తుతం ఓటర్ల జాబితా సవరణ (SIR) ప్రక్రియ కొనసాగుతుండటంతో ఎన్నికలు మరింత ఆలస్యం కానున్నాయని తెలుస్తోంది.

రాష్ట్రంలో గ్రామ పంచాయతీ, మున్సిపల్ ఎన్నికలు ఇప్పటికే పూర్తయ్యాయి. ZPTC, MPTC ఎన్నికలు మాత్రం జరగకపోవడంతో కేంద్రం నుంచి రావల్సిన నిధులు నిలిచిపోయాయి. ఎన్నికల నిర్వహణ కోసం రాష్ట్ర ఎన్నికల సంఘం (SEC) గతంలో కసరత్తు చేసింది. రిజర్వేషన్ల ప్రక్రియ పూర్తి చేసి, హైకోర్టు అనుమతితో మే నెలలో ఎన్నికలు నిర్వహించాలని ప్రయత్నించినా అది సాధ్యం కాలేదు.

ఇటీవల SEC మరోసారి ఓటర్ల జాబితాలను సిద్ధం చేయాలని అధికారులను ఆదేశించింది. కానీ ఇదే సమయంలో ప్రత్యేక ఓటర్ల జాబితా సవరణ (SIR) కార్యక్రమం జూన్ 25 నుంచి జూలై 24 వరకు కొనసాగుతోంది. ఈ కార్యక్రమంలో ఇంటింటి సర్వే చేసి ఓటర్ల వివరాలు సేకరిస్తారు. ముసాయిదా జాబితా జూలై 31న విడుదల కానుంది. అభ్యంతరాలు, పేర్ల చేర్పులకు ఆగస్టు 30 వరకు అవకాశం ఉంటుంది. తుది ఓటర్ల జాబితా మాత్రం అక్టోబర్ 1న వెల్లడిస్తారు.

SEC వర్గాలు తెలిపిన సమాచారం ప్రకారం, ప్రస్తుతం ఉన్న ఓటర్ల జాబితా ఆధారంగా ఎన్నికలు నిర్వహిస్తే ఎవరైనా కోర్టుకు వెళ్లే అవకాశం ఉంది. అలా జరిగితే మొత్తం ప్రక్రియ నిలిచిపోయే ప్రమాదం ఉందని నిపుణులు హెచ్చరిస్తున్నారు. అందువల్ల తుది జాబితా వచ్చే వరకు వేచి చూడడం మంచిదని SEC భావిస్తోంది. ఇప్పటి వరకు ఎన్నికలకు సంబంధించి రాష్ట్ర ప్రభుత్వం SEC కి ఎలాంటి సమాచారం ఇవ్వలేదు.

నూతన ఓటర్ల జాబితా వచ్చే వరకు ఎన్నికలు ఆగితే, కొన్ని రాజకీయ పార్టీలు ఆందోళన చెందుతున్నాయి. ప్రస్తుత జాబితాలో చనిపోయిన వారి పేర్లు, నకిలీ, డబుల్ ఓట్లు వంటి లోపాలు ఉన్నాయని అభిప్రాయం ఉంది. SIR పూర్తయితే ఇలాంటి ఓట్లన్నీ తొలగిపోతాయి. ఫలితంగా కొత్త జాబితా ఎలా ఉంటుందో, ఎన్నికల్లో తమ భవిష్యత్తు ఏమిటోనని పలువురు నేతలు ఆందోళన పడుతున్నట్టు తెలుస్తోంది.

మొత్తంగా తుది ఓటర్ల జాబితా విడుదలయ్యే వరకు పరిషత్ ఎన్నికలు జరిగే అవకాశం లేదని SEC సంకేతాలు ఇస్తోంది. కేంద్ర నిధులు రావడంలో జాప్యం కొంతకాలం పాటు కొనసాగే అవకాశం ఉంది.