పెద్దపల్లి వివాదంపై పీసీసీ చీఫ్ పిలుపు: శ్రీధర్ బాబు, గడ్డం వంశీకి గాంధీ భవన్ ఆదేశం

తెలంగాణ పీసీసీ చీఫ్ మహేష్ కుమార్ గౌడ్ మంత్రి శ్రీధర్ బాబు, పెద్దపల్లి ఎంపీ గడ్డం వంశీలను గాంధీ భవన్‌కు పిలిపించారు. ఇద్దరికీ ఈరోజు మధ్యాహ్నం 12:30 గంటలకు సమయం ఇచ్చారు.

పెద్దపల్లి ఎంపీ గడ్డం వంశీ మంత్రి శ్రీధర్ బాబుకు ఇటీవల ఒక లేఖ రాశారు. తన ట్రస్ట్ ఆధ్వర్యంలో చేపట్టిన కార్యక్రమాలకు హాజరైన వారిని పార్టీ నుంచి సస్పెండ్ చేయడంపై ఆ లేఖలో అభ్యంతరం తెలిపినట్టు సమాచారం. రాహుల్ గాంధీ కార్యక్రమానికి సంబంధించి రామలీలా మైదానంలో జరిగిన ధర్నాకు మంత్రి శ్రీధర్ బాబు, రామగుండం ఎమ్మెల్యే మాఖన్ సింగ్ రాజ్ ఠాకూర్, పెద్దపల్లి ఎమ్మెల్యే విజయరామణరావు హాజరుకాలేదని లేఖలో ప్రస్తావన ఉంది. వారిపై ఎలాంటి చర్యలు తీసుకోవద్దని కోరినట్టు తెలుస్తోంది.

ఈ వివాదంపై చర్చించి సయోధ్య కుదిర్చేందుకు పీసీసీ చీఫ్ ప్రయత్నిస్తున్నారు. మంత్రి శ్రీధర్ బాబు ప్రస్తుతం ఒక అధికారిక కార్యక్రమంలో ఉన్నారు. ఆ కార్యక్రమం ముగిసిన తర్వాత గాంధీ భవన్‌కు వస్తారని మంత్రి కార్యాలయం తెలిపింది. ఆయన వచ్చిన తర్వాత ఎంపీ లేఖపై వివరణ ఇచ్చే అవకాశం ఉంది. తర్వాత ఎంపీ గడ్డం వంశీని కూడా పిలిచి మాట్లాడాలని పీసీసీ భావిస్తోంది.

మరో వివాదంపై నిన్న చర్చలు జరగాల్సి ఉంది. మంత్రి దామోదర్ రాజ నరసింహ, జుక్కల్ ఎమ్మెల్యే తోట లక్ష్మీకాంతరావు మధ్య విభేదాలపై ఇద్దరిని గాంధీ భవన్‌కు పిలిచారు. దామోదర్ రాజ నరసింహ రాకపోవడంతో చర్చలు జరగలేదు. పీసీసీ చీఫ్ సుమారు రెండు గంటల పాటు వేచి ఉన్నట్టు సమాచారం.

పార్టీ క్రమశిక్షణ విషయంలో పీసీసీ కఠినంగా ఉంది. రెండు రోజుల కిందట విడుదల చేసిన ప్రెస్ నోట్‌లో ఈ అంశాన్ని ప్రస్తావించారు. క్రమశిక్షణ దాటిన వారిపై ఎంత పెద్ద నేత అయినా కఠిన చర్యలు తీసుకుంటామని అందులో పేర్కొన్నారు. ముందుగా నేతలను గాంధీ భవన్‌కు పిలిచి మాట్లాడుతామని, సమస్యలు పరిష్కారం కాకపోతే చర్యలు తీసుకుంటామని పార్టీ వర్గాలు తెలిపాయి.