తెలంగాణలో రెండు రోజుల పాటు వర్షాలు; హైదరాబాద్‌లో జలమయం, ప్రాజెక్టులకు వరద ఉధృతి

తెలంగాణలో రాబోయే రెండు రోజులు భారీ వర్షాలు కురిసే అవకాశం ఉందని వాతావరణ శాఖ అధికారులు హెచ్చరించారు. ఇవాళ రాష్ట్రవ్యాప్తంగా అక్కడక్కడ తేలికపాటి నుంచి మోస్తరు వర్షాలు కురిశాయి.

హైదరాబాద్‌లోని సికింద్రాబాద్ కంటోన్మెంట్, యూసఫ్‌గూడా, బంజారా హిల్స్, జూబ్లీ హిల్స్, బషీర్ బాగ్, అబిడ్స్, కోటి, నారాయణగూడా తదితర ప్రాంతాల్లో వర్షం పడింది. మాతన్నపేట, సైదాబాద్, దిల్‌సుక్ నగర్, కొత్తపేట్, చంపాపేట్, మలక్‌పేటలో రోడ్లపై నీరు చేరడంతో వాహనదారులు తీవ్ర ఇబ్బందులు ఎదుర్కొన్నారు. జగిత్యాల జిల్లాలో మోస్తరు వర్షం కురియగా, పట్టణంలో లోతట్టు ప్రాంతాలు నీట మునిగాయి.

కొమరంభీం జిల్లా బెజ్జూరు మండలంలో భారీ వర్షం కారణంగా సుష్మీర్ గ్రామం వద్ద వాగుకు వరద పెరిగి రాకపోకలు నిలిచిపోయాయి. కాగజ్‌నగర్ మండలంలోనూ సాయంత్రం తర్వాత భారీ వర్షం పడింది.

ఎగువన కురుస్తున్న వర్షాలతో ప్రాజెక్టులకు వరద నీరు కొనసాగుతోంది. నిర్మల్ జిల్లా కడం ప్రాజెక్టుకు 821 క్యూసెక్కుల ఇన్‌ఫ్లో వస్తుండగా, 100 క్యూసెక్కులు మాత్రమే విడుదల చేస్తున్నారు. నీటిమట్టం 700 అడుగుల గరిష్ఠానికి 699 అడుగులకు చేరింది. రాజన్న సిరిసిల్ల జిల్లాలోని మిడ్మానేరు ప్రాజెక్టుకు ఎల్లంపల్లి పంప్ హౌస్ నుంచి 12,600 క్యూసెక్కులు, మూలవాగు మానేరు వాగుల నుంచి 1,819 క్యూసెక్కుల చొప్పున వరద వస్తోంది. అధికారులు నాలుగు గేట్లు ఎత్తి లోయర్ మానేరు డ్యామ్‌కు 5,000 క్యూసెక్కుల నీటిని వదులుతున్నారు.

మహబూబ్‌నగర్ జిల్లా జూరాల ప్రాజెక్టుకు 2,26,000 క్యూసెక్కుల ఇన్‌ఫ్లోతో 30 గేట్లు ఎత్తి 2,36,853 క్యూసెక్కులు దిగువకు విడుదల చేస్తున్నారు. శ్రీశైలం ప్రాజెక్టుకు జూరాల నుంచి 68,000 క్యూసెక్కుల ఇన్ఫ్లో వస్తుండగా, 62,493 క్యూసెక్కులు అవుట్ఫ్లోగా కొనసాగుతోంది. ప్రాజెక్టు నీటిమట్టం 885 అడుగులకు 877 అడుగులు నమోదైంది.