తెలంగాణలో లోటు వర్షపాతం: 19 జిల్లాల్లో 20-57% వరకు వర్షం తక్కువ

ఈ ఏడాది వానాకాలం సీజన్ మొదలై నెల రోజులు దాటినా తెలంగాణలో చాలా జిల్లాల్లో సరైన వర్షాలు కురవలేదు. దీంతో రాష్ట్రవ్యాప్తంగా 15 శాతం లోటు వర్షపాతం నమోదైంది. 19 జిల్లాల్లో 20 నుంచి 57 శాతం వరకు వర్షం తక్కువగా నమోదైనట్లు అధికారిక సమాచారం తెలుస్తోంది.

విత్తనాలు వేసిన రైతులు భారీ వర్షం కోసం ఎదురుచూస్తున్నారు. మట్టిలోని తేమ తగ్గి దుక్కులు ఎండిపోతున్నాయి. భూగర్భ జలాలు కూడా అడుగంటడంతో బోర్లు, బావులు ఎండిపోతున్నాయి. హన్మకొండ, మేడ్చల్-మల్కాజగిరి, వరంగల్, జోగులాంబ గద్వాల జిల్లాల్లో 40 శాతానికి పైగా లోటు కనిపిస్తోంది.

కృష్ణా నదికి ఎగువన వర్షాలు పడడంతో ఆల్మట్టికి 1.30 లక్షల క్యూసెక్కుల వరద వస్తోంది. తుంగభద్రకు 30,000 క్యూసెక్కుల ఇన్ఫ్లో ఉంది. అయితే ఈ నీరు శ్రీశైలం, సాగర్ ప్రాజెక్టుల వరకు రావడానికి 45 రోజులు పడుతుందని నీటిపారుదల అధికారులు అంచనా వేస్తున్నారు. గోదావరి నదిలో ప్రస్తుతం ప్రవాహం చాలా తక్కువగా ఉంది. కేవలం ప్రాణహిత నుంచి లక్ష క్యూసెక్కులకు పైగా వరద కిందికి వస్తోంది.

పశ్చిమ కనుమల్లో ఇప్పుడు వర్షాలు కురుస్తుండగా, ఆగస్టు-సెప్టెంబర్‌లో వర్షాలు తగ్గే అవకాశం ఉందని అంచనా. దీంతో వరద ప్రవాహం తగ్గిపోయే అవకాశం ఉంది. రైతులు ఆందోళన చెందుతున్నారు.